ގުޅިފައިވާ އިދިކޮޅު ސިޔާސީ ޕާޓީތަކުން ރޭ ބޭއްވި އެއްވުމުގެ ތެރެއިން އެމްޑީޕީގެ އެކްޓިވިސްޓު، ނައީމާ މުހައްމަދު (ނައީމާއްތަ) އާއި އެކު ތިން މީހަކު ހައްޔަރުކޮށްފި އެވެ. އިދިކޮޅު ފަރާތްތަކުން އެއްވެ ހަރަކާތެއް ބާއްވާފައި ވަނީ އާޓިފިޝަލް ބީޗު ކުރިމަތީ ހުންނަ އެމްޑީޕީ ޖަގަހަ ސަރަހައްދުގަ އެވެ.
ރޭ 9:30 އިން ފެށިގެން ކުރިޔަށް ދިޔަ މި ހަރަކާތުގެ ތެރެއިން ނައީމައްތަ ހައްޔަރު ކުރީ ހަރުގެ ސަރަހައްދުގައި ފުލުހުންގެ އަމުރަށް ނުކިޔަމަންތެރިވި ކަމަށް ބުނެ އެވެ. ނައީމައްތަގެ އުމުރުން މިހާރު 70 އަހަރަށް ވުރެ މަތިވާނެ އެވެ. ނައީމައްތަގެ އިތުރުން އެމްޑީޕީގެ އާންމު ދެ މެންބަރަކު ވެސް ހައްޔަރު ކުރި އެވެ.
މި ހަރަކާތުގައި އިދިކޮޅު ޕާޓީތަކުގެ ލީޑާޝިޕްގައި ހިމެނިވަޑައިގަންނަވާ ފަރާތްތަކަކާއި ރައްޔިތުން މަޖިލީހުގެ މެންބަރުން ވަނީ ވާހަކަދައްކަވައިފަ އެވެ. އަދި އެ ސަރަހައްދަށް އެއްވެ ތިބި މީހުން ހުރީ މަޖިލީސް މެންބަރުން ދޫކޮށްލުމަށް ގޮވާލާ ބެނާތަކާއި ފޮޓޯތައް ހިފައިގެނެވެ.
ފުލުހުން އެ ސަރަހައްދަށް އައިސް އެ ހަރަކާތަށް ހުރަސް އެޅުމަށް ފުރަތަމަ މަސައްކަތް ކުރި އެވެ. ނަމަވެސް ފަހުން އެތަނުގެ ޓްރެފިކް ފްލޯއަށް ދަތި ނުވާ ގޮތަށް މީހުން އެއްފަރާތައް ޖައްސާ ހަރަކާތް ނިމެންދެއް ކުރިޔަށް ގެންދިޔުމަށް ފުރުސަތު ދިނެވެ.
އެމްޑީޕީން މިއަދު ރާއްޖޭގެ ބޮޑެތި ރަށްތަކުގައި ވެސް ވަނީ ސިޔާސީ ހަރަކާތްތައް ކުރިޔަށް ގެންގޮސް މުޒާހަރާކޮށްފަ އެވެ. އެގޮތުން އައްޑު އަދި ފުވަމުލަކު ސިޓީއާ ގދ ތިނަދޫ އަދި ގއ ވިލިނގިލީގައި ވެސް އެ މުޒާހަރާ ކުރިޔަށް ދިޔަ އެވެ.