މިދިޔަ ޖުލައި މަހުގެ 27 ވަނަ ދުވަހުގެ ރޭ ޓާމިނަލް ކެފޭގެ ތެރޭގައި އިންދާ މަރާލި ނަދީމް އަބްދުއްރަހްމާންގެ މަރުގެ މައްސަލާގައި ހައްޔަރު ކުރި ގ. ޝާރާޒް، މުހައްމަދު މަފާޒް ދޫވެފައި ހުރީ ހުކުމް ތަންފީޒުކޮށް ނިމުމުން ކަމަށް ފުލުހުން ބުނެފި އެވެ.
މަފާޒް އަކީ ކުރީގެ ހޯމް މިނިސްޓަރު އުމަރު ނަސީރު، މޮނިކޮމް އަމުރު ނެރުއްވާ ޓެގް އެޅުވި މީހެކެވެ. އަދި މޮނިކޮމް އަމުރާ ހިލާފުވެގެން ހޯމް މިނިސްޓަރަށް ލިބި ވަޑައިގަންނަވާ ބާރު ބޭނުން ކުރައްވާ އޭނާގެ ޝަރީއަތް ނިމެންދެން ޖަލަށްލާން އަމުރުމޮށް ޖަލަށް ބަދަލު ވެސް ކުރި މީހެކެވެ.
ނަމަވެސް މަފާޒް ދޫވެ، ނަދީމް މަރާލި މައްސަލާގައި އޭނާއަށް އަނެއްކާ ހައްޔަރުކުރުމާ ގުޅިގެން މަފާޒް ދޫވީ ކިހިނެތްތޯ ސުވާލު އުފެދިފައި ވަނިކޮށް ފުލުހުން މިއަދު ބުނީ މޮނިކޮން އަމުރާ ހިލާފުވެގެން ހައި ކޯޓުން މަފާޒަށް އެއް އަހަރުގެ ޖަލު ހުކުމެއްކޮށްފައިވާ ކަމަށާއި އެ ހުކުމް ތަންފީޒުކޮށް ނިމިގެން މި އަހަރު އޭޕްރިލް މަހު އޭނާ ބަންދުން ދޫކުރެވިފައިވާ ކަމަށެވެ.
ނަދީމް މަރާލި މައްސަލާގައި މަފާޒް ހައްޔަރު ކުރީ މިދިޔަ ހުކުރު ދުވަހުގެ ރޭ ގ. ޖެލީފިޝްގެ ތެރެއިންނެވެ. އަދި އެ ގެއިން ބައެއް ތަކެތިވެސް ފުލުހުންގެ ފޮރެންސިކް ޓީމުން ވަނީ ބެލުމުގެ ދަށަށް ގެންގޮސްފަ އެވެ.