އިލެކްޝަންސް ކޮމިޝަނުން ގޮނޑި ގެއްލިފައިވާކަމަށް ނިންމާފައިވާ، ތުލުސްދޫ ދާއިރާގެ މެންބަރު މުހައްމަދު ވަހީދު، ލޯޔަރު ވައްޑެގެ ބަންދަށް އަނެއްކާ ވެސް ހަތަރު ދުވަސް ޖަހައިފި އެވެ.
އޭނާގެ ބަންދަށް މިފަހުން ޖެހި ހަތަރު ދުވަހުގެ މުއްދަތު މިއަދު ހަމަވުމުގެ ކުރިން އޭނާ ކްރިމިނަލް ކޯޓަށް ހާޒިރު ކުރުމުން ކޯޓުން އަމުރު ކުރީ އަދި އިތުރު ހަތަރު ދުވަހަށް އޭނާ ބަންދުގައި ބެހެއްޓުމަށެވެ. އަދި އެ ހަތަރު ދުވަހުގެ ތެރޭގައި، ވައްޑެއާ މެދު ތަހުގީގު ކުރާ މައްސަލައިގައި އޭނާގެ މައްޗަށް ދައުވާ ކުރުމާ މެދު ޕީިޖީ އިން ގޮތެއް ނިންމަން ޖެހޭނެ ކަމަށް ވެސް ކޯޓުން އަމުރުކުރި އެވެ.
ފުލުހުން ވައްޑެ ހައްޔަރު ކުރީ އޭނާގެ ގޮނޑި ގެއްލިފައިވަނިކޮށް، ރައްޔިތުން މަޖިލީހުގެ އިދާރާއަށް ވަދެފައިވާތީ އެވެ. އޭނާގެ ބަންދުގެ މުއްދަތު އެންމެ ފުރަތަމަ ޖެހީ 15 ދުވަހަށެވެ. އޭނާގެ ގޮނޑި ގެއްލުނު މައްސަލައިގެ އަޑުއެހުމެއް ވެސް ސުޕްރީމް ކޯޓްގައި ކުރިއަށް ދެ އެވެ. އެ މައްސަލައިގެ އަޑުއެހުންތައް މިއަދު ވަނީ ނިންމައިފަ އެވެ. ދެން އޮތީ ހުކުމް ކުރުމެވެ.
އިލެކްޝަންސް އިން ގޮނޑި ގެއްލުނުކަމަށް ކަނޑައަޅާފައި ވަނިކޮށް މަޖިލީުގެ އިދާރާއަށް ވަތް މައްސަލައިގައި، މަޑުއްވަރީ ދާއިރާގެ މެންބަރު މުހައްމަދު އަމީތު އާއި ވިލިގިލާ ދާއިރާގެ މެންބަރު ސައުދު ހުސެއިންގެ މައްސަލަ އަންނަނީ ބަލަމުން އެވެ. އަދި ފަނޑިޔާރަކު އަވަހާރަކޮށްލަން ރޭވިކަމުގެ ތުހުމަތުގައި ސައުދުގެ މައްޗަށް ވަނީ ޓެރަރިޒަމްގެ ދައުވާއެއް ވެސް އުފުލައިފަ އެވެ.