އިދިކޮޅު ފަރާތްތަކުން ދައްކާ ސިޔާސީ ވާހަކަތަކަށް ރައްދު ދިނުން ހުއްޓާލުމަށް ފަހު ތަރައްގީގެ އެޖެންޑާތަކައިގެން ކުރިޔަށް ދާން ރައީސް އަބްދުﷲ ޔާމީން އަބްދުލް ގައްޔޫމް އަޒުމް ކަނޑައަޅުއްވައިފި އެވެ.
ޕީޕީއެމް އިން މާލެ ހިޔާ ކައިރީ ހުޅުވާ "ރުމާލު ދޭއް" ޖަގަހަ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ އެމަނިކްފާން ވެރިކަމާ ހަވާލުވީ އިރު ވިސްނަވައިގެން ހުންނެވީ ރައްޔިތުންނާ ހަމަޔަށް ގެނެސްދިން މެނިފެސްޓޯ ތަންފީޒު ކުރުމަށް ހުރިހާ ވަގުތެއް އެ މަސައްކަތައް ހުސްވާން ލިބޭނެ ކަމަށެވެ. ނަމަވެސް އެ މަސައްކަތުން އެއްފަރާތްކޮށްލުމަށް ގިނަ ބަޔަކު މަސައްކަތް ކުރަމުންދާ ކަމަށާއި އެގޮތުން ވެރިކަމުގެ ފުރަތަމަ ދުވަހުން ފެށިގެން އެންމެ ގާތް އަހުންނާ ވެސްހަނގުރާމަަ ކުރަން ޖެހުން ކަމަށް ރައީސް ޔާމީން ވިދާޅުވި އެވެ.
"ހަމައެކަނި ތަފާތަކީ މި ގައުމަށް ބޭރުގެ އުދުވާނީ ހަމަލާއެއް ނާންނަކަން، ނަމަވެސް އެ ހަމަލާއަށް ވުރެ ބޮޑެތިކަންކަމާ އަޅުގަނޑު ކުރިމަތިލައިފިން، އެކަން އެގޮތަށް އެ ވަނީ އުސޫލުތަކާ އެއްގޮތަށް ކަން ކުރަން ބޭނުންވާ ވެރިޔަކު ބަހައްޓަން ބޭނުން ނުވާތީ،" ރައީސް ޔާމީން ވިދާޅުވި އެވެ.
ރައީސް ވިދާޅުވީ އިދިކޮޅު ފަރާތްތަކުން މިއަދުވެސް ކުރިމަތި ކުރުވާ އުނދަގޫތަކަކީ ރަނގަޅު އުސޫލުތަކާ އެކީ ވެރިކަން ކުރައްވާތީ އެކަން ގަބޫލު ނުކުރެވިގެން ކުރާ މަސައްކަތްތަކެއް ކަމަށެވެ. ނަމަވެސް އެކަންކަމަށް ރައްދު ދިނުމަށް ވަގުތު ހުސް ކުރުމުގެ ބަދަލުގައި ތަރައްގީގެ އެޖެންޑާއާގެން ކުރިޔަށް ދިޔުމަށް އަޒުމު ކަނޑައަޅާފައިވާނެ ކަމަށާއި އެ މަސައްކަތް 2018އަ ހަމަޔަށް ކުރިޔަށް ދާނެ ކަމަށް ރައީސް ޔާމީން ވިދާޅުވި އެވެ.
"މިޖަގަހާގައި ސިޔާސީ ގޮތުން ޖަވާބު ދާރީވާން އަޅުގަނޑުމެންގެ ޕާޓީގެ ފަރާތްތައް ތިބޭނެ، ނަމަވެސް އަޅުގަނޑު މި ނިންމީ އަޅުގަނޑު ކޮންމެހެން ސިޔާސީ ކަންކަމަށް ރައްދު ދޭކަށް ނުޖެހޭނެ، އަޅުގަނޑު އެކަމެއް ނުކުރާނަން، އަޅުގަނޑު އަނެއްކާވެސް އަޒުމު މި ކަނޑައެޅީ އަޅުގަނޑުގެ އެޖެންޑާއާ އެކީގައި ކުރިޔަށް ދާން، އޭގެ ބަދަލުގައި ރައްޔިތުން ހިތް އެދޭ ވަރަށް ތަރައްގީ ގެނެސްދިނުމުގައި މަޝްއޫލުވެނގެން 2018 ގެ ވޯޓާ ހިސާބަށް ދަންދެއް އަޅުގަނޑު އެ ގޮތުގައި ދެމި ހުންނަން،" ރައީސް ޔާމީން ވިދާޅުވި އެވެ. "ރައީސް ޔާމީން ސިޔާސީ މަސައްކަތް ހުއްޓާއްވަނީ ނޫން، އަޅުގަނޑު ދަތުރުވެސް ކުރާނަން، ސިޔާސީ މަަސައްކަތް ވެސް ކުރާނަން، ނަމަވެސް ރައްދު ދިނުން ފަދަ ކަންކަމަކީ ކޮންމެ ދުވަހުގެ ޑެއިލި ޝެޑިއުލްގެ ތެރޭގައި ނުހިމަނާނަން،" ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ އަންނަ އަހަރަކީ އެމަނިކްފާނުގެ ވެރިކަމުގައި ކުރެވުން ތަރައްގީގެ އެންމެ ބޮޑެތި މަސައްކަތްތައް ނިމޭ އަހަރު ކަމަށެވެ. އަދި އެއަށް ފަހު 2018 ވަނަ އިންތިހާބު ވެއްޖެ ނަމަ ގެނެސްދޭނެ ތަރައްގީގެ މަޝްރޫއުތަކާއި ދެން އޮތް ފަސް އަހަރު ކުރަން ޖެހޭ މަސައްކަތްތަކަކީ ކޮބާކަން ރާވަން ޖެހޭ ކަމަށާއި އެ މަސައްކަތް މިހާރު ފަށާފައިވާ ކަމަށް ރައީސް ޔާމީން ވިދާޅުވި އެވެ.