މި އަހަރުގެ ކުރިން މަސްވެރިންގެ ހުރިހާ ކަންބޮޑުވުންތަކަށް ހައްލު ހޯދައިދޭނެ ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީޕީއެމްގެ ޖަގަހަ ހުޅުވުމަށް ރޭ ބޭއްވި ހަފްލާފައި ވާހަކަފުޅު ދައްކަވަމުން ރައީސް ޔާމީން ވިދާޅުވީ މަސްވެރިންނަށް ދިމާވެފައި ހުރި ދަތިތަކާއި މަސްވެރިންގެ ކަންބޮޑުވުންތައް ސަރުކާރަަށް އެނގޭ ކަމަށެވެ. އެހެންކަމުން މަސްވެރިންގެ ހުރިހާ މައްސަލަތަކަށް ހައްލު ހޯދުމަށް މީގެ މަހެއްހާ ދުވަސް ކުރިން އިގްތިސާދީ ކޮމިޓީގައި މަސައްކަތްތަކެއް ކުރެވުނު ކަމަށާއި އެގޮތުން އެ މައްސަލަތައް ހައްލު ކުރުމަށް 20 މިލިއަން ޑޮލަރުގެ ބަޖެޓެއް އެއްފަރާތް ކުރެވިގެން ދިޔަ ކަމަށް ރައީސް ޔާމިން ވިދާޅުވި އެވެ.
"މަސްވެރިން އެންމެ އުނދަގޫކޮށް އުޅުން އިރު އުޅެން ޖެހުނު ހާލު ގަބޫލު ކުރެވޭ، އެކަންކަން އިހުސާސް ކުރެވޭ، އެކަން ހައްލު ކުރުމަށް އިތުރު ތަނަކުން ލޯނެއް ހޯދަން ނުޖެހޭ، މިއީ ސަރުކާރު ބަޖެޓުގެ ތެރެއިން ކުރާނެ ކަންކަން، އެހެންވެ އަޅުގަނޑު އުންމީދު ކުރަނީ މި އަހަރު ހުސްވުމުގެ ކުރިން މަސްވެރިންގެ މިހާރު ހުރި ހުރިހާ ޝަކުވާތަކެއް ހައްލުކޮށްދެވޭނެ ކަމަށް،" ރައީސް ޔާމީން ވިދާޅުވި އެވެ.
އެގޮތުން 20 މިލިއަން ޑޮލަރުން ކުރަން ރާވާފައި ހުރި ބައެއް މަސައްކަތްތަކަށް އަލިއަޅުވާލަމުން ރައީސް ޔާމީން ވިދާޅުވީ އެ ފައިސާއިން ކުރާނެ އެންމެ މުހިންމު މަސައްކަތަކީ މިހާރު ހަލާކުވެފައި ހުރި އައިސް ޕްލާންޓުތައް ހެދުމާއި އައިސް ޕްލާންޓުތައް ގެނައުމުގެ މަސައްކަތް ވެސް ކުރާނެ ކަމަށެވެ. އޭގެ އިތުރުން އަމިއްލަ ދޯނި ފަހަރުގައި އައިސް އުފެއްދޭނެ ގޮތް ހެދުން ފަދަ މަޝްރޫއުތައް މި އަހަރު ތެރޭގައިކޮށް ނިންމާނެ ކަމަށް ރައީސް ޔާމީން ވިދާޅުވި އެވެ.