ކުރިއަށް އޮތް ތަނުގައި ކުނި ރިސައިކަލް ކުރުމުގައި އާ މަރުހަލާ ތަކަކަށް ކަނޑައްތު ކުރުމަށް ވިސްނުންތަކެއް އެބަހުރި ކަމަށާއި ދިރާސާތަކެއް ކުރުމަށް ފަހު ކައިރި މުސްތަގުބަލެއްގައި ރީސައިކަލިން ފެސިލިޓީއެއް ގާއިމް ކުރާނެ ކަމަށް އެމްޑަބްލިއުއެސްސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވެއްޖެ އެވެ.
އެމްޑަބްލިއުއެސްސީގެ ރިސައިކަލްސްގެ ނަމުގައި ބޭއްވި މައުރަޒުގެ ނަތީޖާ އިއުލާނުކުރަން ބޭއްވި ރަސްމިއްޔާތުގައި ފަޒުލް ވިދާޅުވީ ޕެޓް ފުޅި ލުއި ކުރުމުގެ މަސައްކަތް ތަކެއް ކުރިއަށްދާ ކަމަށެވެ. އަދި ކުނި ރިސައިކަލް ކުރުމުގެ ވިޔަފާރިއާ ގުޅޭ ޑެވެލޮޕްމަންޓް ފީޒިބިލިޓީ ތަކެއް މިހާރު ހަދާފައިވާ ކަމަށް ފަޒުލް ވިދާޅުވި އެވެ. އެ ނަތީޖާއަށް ބަލައި ކައިރި މުސްތަގުބަލެއްގައި ރީސައިކަލިން ފެސިލިޓީއެއް ގާއިމް ކުރާނެ ކަމަށް ފަޒުލް ވިދާޅުވި އެވެ.
ފަޒުލް ވިދާޅުވީ އެ ކުންފުނިން އުފައްދާ ޕްލާސްޓިކް ފުޅިތައް ނުވަތަ އުފައްދާ ޕްރޮޑަކްޓްތަކުގެ އަގެއް ހުންނާނެ ކަމަށާއި ކޮންމެ ފުޅިއެއް އަނބުރާ ރައްދުކޮށްދީފިނަމަ އެއަށް އެކަށީގެންވާ އަގު އެފަރާތަކަށް ރައްފުކޮށްދޭނެ ކަމަށެވެ. އަދި ފުޅި ބޭނުންކޮށްގެން ތިމާވެއްޓަށް ލިބޭ ގެއްލުން ކުޑަކުރުމަށް ކުރެވެން ހުރި ކަންކަން ކުންފުންޏެއްގެ ހައިސިއްޔަތުންނާއި އާންމު ފަރުދެއްގެ ހައިސިއްޔަތުން ކުރަމުންދާނެ ކަމަށް ފަޒުލް ވިދާޅުވި އެވެ.
"ވަރަށް އަވަހަށް ތައާރަފް ކުރެވިގެންދާނީ އަޅުގަނޑުން މެން އުފައްދާ ޕްރޮޑަކްޓްތަކުގެ އަގެއް ހުންނަ ކަން، އަޅުގަނޑުމެން އުފައްދާ ކޮންމެ ބޮޓަލްއެއް އަނބުރާ ރައްދުކޮށްދީފިނަމަ އޭގެން ހައްގު އަގެއް އެފަރާތަކަށް ރައްދުކޮށްދޭނަން، މި ދަންނަވަނީ ވަރަށް ކުޑަކުޑަ ފައިސާއެއްގެ ވާހަކަ، މީގެ އެވެއާނެސް އިތުރުކުރަން ޖެހޭ، ފުޅި ބޭނުންކޮށްފައި ލިބޭ ގެއްލުން މިނިމައިޒް ކުރުމަށްޓަކައި ކުރެވެން ހުރި ކަންކަން ކުންފުންޏެއްގެ ހައިސިއްޔަތުންނާއި އާންމު ފަރުދެއްގެ ހައިސިއްޔަތުން ކުރަމުންދާނަން،" ފަޒުލް ވިދާޅުވި އެވެ.
ރޭ ބޭއްވި ރަސްމިއްޔާތުގައި އެމްޑަބްލިއުއެސްސީގެ ރިސައިކަލްސް މުބާރާތުގައި އެކި ވަނަ ވަނަތަކަށް ހޮވުނު ކުދިންނަށް ވަނީ ހަދާނީ ލިއުމާއި ހަނދާނީ ފިލާ ދީފަ އެވެ. އެ މުބާރާތަކީ ތިމާވެށިގެ ދުވަހާއި ގުޅިގެން މުޅި ރާއްޖެއަށް ހުޅުވާލައިގެން ގެންދިޔަ މުބާރާތެކެވެ. އެ މުބާރާތުގައި މާލެއާއި ރާއްޖެ ތެރޭގެ ފަސް ސުކޫލަކުން ބައިވެރިވެފައި ވެއެވެ. އަދި މުބާރާތުގައި 120 ވުރެ ގިނަ ފަރާތްތަކުން ބައިވެރިވެފައި ވެއެވެ. އަދި އެފަރާތްތަކުގެ މަސައްކަތްތައް ވަނީ އާޓް ގެލަރީގައި ދައްކާލާފަ އެވެ.