ފަސް ރަށެއްގައި ފެނުގެ ނިޒާމް ގާއިމް ކުރަން ދެ ކުންފުންޏަކާއި ހަވާލުކޮށްފި އެވެ. ބ. ކެންދޫ އާއި ކ. ގާފަރު އަދި ލ. ގަމުގެ މަސައްކަތް ހަވާލުކޮށްފައިވަނީ މޯހަން މުތާ އެކްސްޕޯޓްސް ޕްރައިވެޓް ލިމިޓެޑާއެވެ. އަދި ށ. މިލަންދޫ އާއި ރ. އުނގޫފާރުގެ މަސައްކަތް ހަވާލުކޮށްފައިވަނީ މާލޭ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) އަށެވެ.
އެންވަޔަރަންމަންޓް މިނިސްޓްރީގައި މިއަދު ބޭއްވި ރަސްމިއްޔާތެއްގައި އެއްބަސްވުން ތަކުގައި މިނިސްޓްރީގެ ފަރާތުން ސޮއި ކުރެއްވީ މިނިސްޓަރު ތޯރިގު އިބްރާހީމެވެ. މޯހަން މުތާ އެކްސްޕޯޓްސްގެ ފަރާތުން ސޮއިކުރެއްވީ އެ ކުންފުނީގެ އިންޖިނިއަ މިސްޓަ ވިވެކެވެ. އަދި އެމްޑަބްލިއުއެސްސީގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރު އަބްދުﷲ ސަހީލް ޖަލީލެވެ.
ހަމަސް ދުވަހުގެ ތެރޭގައި މަސައްކަތް ނިންމަން އިންޑިއާގެ މޯހަން މުތާ އެކްސްޕޯޓްސް އާއި މަޝްރޫއު ހަވާލުކޮށްފައިވަނީ 15.4 މިލިއަން ރުފިޔާ އަށެވެ. އެ މަޝްރޫއުގެ ދަށުން ކެންދޫ އާއި ގާފަރުގައި އާރޯ ޕްލާންޓަކާއި 50 ޓަނުގެ ސްޓޯރޭޖް ޓޭންކެއް ކޮންމެ ރަށެއްގައި ބަހައްޓާނެ އެވެ. އަދި ގަމުގައި އާރްއޯ ޕްލާންޓަކާއި 50 ޓަނުގެ ދެ ސްޓޯރޭޖް ޓޭންކެއް ހަދާނެއެވެ. އެ މަޝްރޫއުގެ ޑިޒައިންގެ މަސައްކަތް ސްރީލަންކާގެ ކުންފުންޏެއް ކަމުގައިވާ ގްރީންޓެކް ކޮންސަލްޓެންޓްސް އާއި ހަވާލު ކޮށްފައިވަނީ ސެޕްޓެމްބަރު 6، 2015 ގައެވެ.
ސޯޅަ މަސްދުވަހުގެ ތެރޭގައި އެ މަސައްކަތް ނިންމަން އެމްޑަބްލިއުއެސްސީއާ ހަވާލު ކޮށްފައިވަނީ 87.9 މިލިއަން ރުފިޔާ އަށެވެ. މަޝްރޫއުގެ ދަށުން މިލަންދޫގައި 29 ކިލޯމީޓަރުގެ ބޯފެނުގެ ވިއުގައެއް ގާއިމްކޮށް 82 ޓަނުގެ އާރްއޯ ޕްލާންޓެއް ހަދާނެ އެވެ. އަދި އުނގޫފާރުގައި އަށް ކިލޯމީޓަރުގެ ބޯފެނުގެ ވިއުގައެއް ގާއިމްކޮށް 86 ޓަނުގެ އާރްއޯ ޕްލާންޓެއް ބަހައްޓާނެ އެވެ.
މީގެ ކުރިން ހަތް ރަށެއްގެ މަސައްކަތް ހަވާލުކޮށްފައިވާއިރު ބ. އޭދަފުއްޓާއި ތ. ވިލިފުއްޓާއި ތ. ގުރައިދޫ އާއި ގއ. ވިލިނގިއްޔާއި ދ. ކުޑަހުވަދޫގެ އިތުރުން ހއ. ހޯރަފުށި އަދި ހދ. ހަނިމާދޫގެ މަސައްކަތް ފެށިގެން ކުރިއަށް އެބަދެ އެވެ.
އެ މަޝްރޫއަށް ފަންޑު ކޮށްދެއްވަނީ އޯޕެކް ފަންޑް ފޯ އިންޓަނޭޝަނަލް ޑިވެލޮޕްމަންޓް (އޮފިޑް) އިންނާއި ދިވެހި ސަރުކާރުގެ ބަޖެޓުންނެވެ. އޮފިޑުގެ ލޯނު އެގްރީމެންޓުގައި ސޮއިކުރެވިފައިވަނީ ތިން ޖުލައި 2015 ގައެވެ.