ރާއްޖޭގެ ސަރުކާރުން މަޖިލީހުގެ ކަންކަން މިނިވަންކަމާއެކު ކުރުމަށް އެއްބާރުލުން ދީ މަޖިލީހުގެ މަސައްކަތްތަކަށް ހުރަސް ނޭޅުމަށް އެމެރިކާއިން ގޮވާލައިފި އެވެ.
ރާއްޖެ އާއި ލަންކާއަށް ކަނޑައަޅުއްވާފައި ހުންނަވާ އެމެރިކާގެ ސަފީރު އަތުލް ކެޝަޕް ވީޑިއޯ މެދުވެރިކޮށް ދެއްވި ދެއްވި މެސެޖްގައި ވިދާޅުވީ މިދިޔަ ދުވަސްތަކުގައި ރާއްޖޭގެ ރައްޔިތުން މަޖިލީހުގައި ހިންގަމުންދިޔައީ ބަލައިގަންނަން ދަތި ކަންތައްތަކެއް ކަމަށެވެ. އަދި ވަކި ފަރާތަކަށް ނުޖެހޭ ގަވާއިދުތަކެއްގެ ބާރު ހިނގާ މިނިވަން އިންސާފުވެރި މަޖިލީހެއް އޮތުމަކީ ޑިމޮކްރަސީއެއް ހިންގުމަށް މުހިންމު ކަމެއް ކަމަށް ކެޝަޕް ވިިދާޅުވި އެވެ.
ކެޝަޕް ވަނީ ރާއްޖޭގެ ގާނޫނުތަކާއި މަޖިލިސްގެ ގަވާއިދާ އެއްގޮތްވާގޮތުގެ މަތީން މިނިވަންކަމާއެކު މަޖިލިސްގެ މަސައްކަތް ކުރެއްވޭނެ އެންމެހާ ކަންކަން ކަށަވަރުކުރަން ރާއްޖޭގެ ސަރުކާރަށް ގޮވާލާފަ އެވެ. އަދި ކުރިއަށް އޮތް ތަނުގައި ވެސް ދިވެހި ރައްޔިތުންނާއެކު އެމެރިކާއިން ތިބޭނެ ކަމަށާއި ޑިމޮކުރަސީއަށް ކުރާ ތާއީދަށް އަބަދުވެސް ތަރުހީބުދޭނެ ކަމަށް ކެޝަޕް ވިދާޅުވި އެވެ.
''ފާއިތުވެދިޔަ ދުވަސްތަކުގައި ރާއްޖޭގެ ރައްޔިތުން މަޖިލީހުގައި ހިނގަމުންދިޔައީ ބަލައިގަންނަން ދަތި ކަންތަައްތަކެއް، ކަންބޮޑުވާ ކަންތައްތައްކެއް މިނިވަންކަމާއެކު މަޖިލީހުގެ މަސައްކަތް ކުރެވުން ކަށަވަރުކުރަން ރާއްޖޭގެ ސަރުކާރަށް ގޮވާލަން، ދިވެހިރާއްޖޭގައި ސުލްހަވެރި ފާގަތި އަމާން މެދުމިނުގެ ޑެމޮކްރެޓިކް މުސްތަގުބަލެއް ގާއިމް ކުރުމަށް ދިވެހިންގެ ތަސައްވުރަށް ތާއީދު ކުރަން'' ކެޝަޕް ވިދާޅުވި އެވެ.
އެމެރިކާއިން ރާއްޖޭގެ ހާލަތާ މެދު ކަންބޮޑުވި އިރު، މިދިޔަ މަހުގެ 24 ވަނަ ދުވަހު މަޖިލީހުގެ މެންބަރުން މަޖިލީހަށް ވަންނަން އުޅުމުގެ ތެރޭގައި ހިނގި ހަމަނުޖެހުންތަކާ ގުޅިގެން އިދިކޮޅު 12 މެންބަރެއްގެ މައްޗަށް ޖިނާއީ ދައުވާ މިހާރު އުފުލާފައި ވަނީ ޝަރީއަތް ފަށަން ތައްޔާރުވެފަ އެވެ. އަދި ޕާޓީއިން ވަކިކުރުމުގެ ސަބަބުން މަޖިލީހުގެ މެންބަރުކަން ގެއްލިފައިވާ ކަމަށް އިލެކްޝަންސުން ކަނޑައެޅި ހަތަރު މެންބަރެއްގެ ގޮނޑީގެ މައްސަލަ ސުޕްރީމް ކޯޓްގައި ދަނީ ކުރިއަށެވެ.