ރާއްޖޭގެ ހުރިހާ ރަށްތަކާއި ރިސޯޓްތައް ސާފުކުރުމުގެ ޕްރޮގްރާމެއް އަންނަ މަހު ބޭއްވުމަށް އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) ނިންމައިފި އެވެ. އީޕީއޭ އިން ބުނީ "ކޯސްޓަލް ކްލީން އަޕް ޑޭ" ފާހަގަ ކުރުމުގެ މައިގަނޑު މަގުސަދަކީ ހޭޅިފަށާއި ގޮނޑުދޮށާއި މޫދު އަދި ވަށައިގެންވާ ސަރަހައްދުތައް ސާފުކޮށް ބެލެހެއްޓުމުގެ މުހިއްމު ކަމަށް އަލިއަޅުވާލައި ހޭލުންތެރިކަން އިތުރުކުރުން ކަމަށެވެ.
އެގޮތުން ސައުތު އޭޝިއާ ކޯޕަރޭޓިވް އެންވަޔަރަންމަންޓް ޕްރޮގްރާމް (ސަކެޕް) އާއި ސައުތު އޭޝިއާ ސީސް ޕްރޮގްރާމްގައި ބައިވެރިވާ ގައުމުތަކުން ގޮނޑުދޮށްތައް ސާފުކުރުމުގެ ޕްރޮގްރާމެއް ކުރިއަށް ގެންދިއުމަށް ހަމަޖެހިފައިވާ ކަމަށް އީޕީއޭ އިން ބުންޏެވެ.
އީޕީއޭ އިން ބުނީ މިއަހަރު ގެ ބައިނަލްއަގުވާމީ "ކޯސްޓަލް ކްލީން އަޕް ޑޭ" ފާހަގަކުރުމުގެ ގޮތުން ސެޕްޓެމްބަރު 16 އިން ފެށިގެން އެއް ހަފްތާއަށް މުޅި ރާއްޖޭގެ މީހުން ދިރިއުޅޭ ހުރިހާ ރަށެއްގައި އަދި ރިސޯޓްތަކުން ސާފުކުރުމުގެ ޕްރޮގްރާމެއް ކުރިއަށްގެންދާނެ ކަމަށެވެ. އަދި އެ ސާފުކުރުމުގެ ޕްރޮގްރާމުގަައި ޕްލާސްޓިކާއި ބިއްލޫރި ފަދަ ކުނިތައް ނެގުމަށްފަހު އެކުނިތަކުގެ އޮޑިޓެއް ހެދުމަށްވެސް ނިންމާފައިވާ ކަމަށް އީޕީއޭ އިން ބުންޏެވެ.
އީޕީއޭ އިން ބުނީ އެ ޕްރޮގްރާމް ކުރިއަށްގެންދިއުމަށް ހަމަޖެހިފައިވަނީ އަތޮޅު ކައުންސިލްތަކާއި ސިޓީ ކައުންސިލްތަކާއި ރަށު ކައުންސިލްތަކާއި ސްކޫލްތަކާއި ސަރުކާރުގެ އިދާރާތަކާއި ޖަމިއްޔާތަކާއި އާއްމު ރައްޔިތުން ގުޅިގެން ކަމަށެވެ. އަދި އަންނަ މަހު 17 އިން 20 އަށް އެ ހަރަކާތާއި ބެހޭ މައުލޫމާތާއި ހޭލުންތެރިކުރުމުގެ ޕްރޮގްރާމްތައް މީޑިޔާ މެދުވެރިކޮށް ކުރިއަށް ގެންދާނެ ކަމަށާއި އެ މުއްދަތުގެ ތެރޭގައި ސްކޫލްތަކުން ތަފާތު ހަރަކާތްތައް ކުރިއަށް ގެންދިއުމަށްވެސް ހަމަޖެހިފައިވާ ކަމަށް އީޕީއޭ އިން ބުންޏެވެ.