މާލޭ ދެކުނު ފަރާތުގައި ކަނޑާފައިވާ އާ ނެރުގެ މަަސައްކަތް އެއްކޮން ނުނިމޭތީ އެ ސަރަހައްދުގެ ފަޅާއި ނެރު ބޭނުން ނުކުރަން ހައުސިން މިނިސްޓްރީގެ ފަރާތުން އަނެއްކާވެސް އަންގައިފި އެވެ.
ހައުސިން މިނިސްޓްރީގެ ފަރާތުން މިއަދު ނެރުނު ނޫސް ބަޔާނެއްގައި ބުނީ، ދެކުނު ފަރާތު ފަޅަށް ވަނުމަށް ކަނޑާފައިވާ ނެރުގެ މަސައްކަތް އަދިވެސް އެއްކޮށް ފުރިހަމަ ނުވާ ކަމަށެވެ. އެހެން ކަމުން އެ ނެރު ބޭނުން ކުރުމަކީ އެހާ ރައްކާތެރި ކަމެއް ނޫން ކަމަށާއި ފަސިންޖަރުންނާއި މުދާއުފުލުމަށް އެ ނެރު ބޭނުން ނުކުރަން ހައުސިން މިނިސްޓްރީން ބުންޏެވެ.
ހައުސިން މިނިސްޓްރީން ބުނީ އެ ނެރުގެ މަސައްކަތް އެއްކޮށް ނުނިމޭތީ މިދިޔަ އަހަރުވެސް ނެރާއި ފަޅު ބޭނުން ނުކުރަން އަންގާފައިވާނެ ކަމަށާއި ނަމަވެސް ބައެއް ފަރާތްތަކުން އެންގުމާއި ހިލާފަށް ނެރު ބޭނުން ކުރަމުން ގޮސްފައިވާ ކަމަށެވެ. އެކަމުގެ ސަބަބުން ނެރުމަތި ގަދަވާ ހާލަތްތަކުގައި އޮޑިދޯނި ފަހަރަށާއި މުދަލަށާއި މީހުންނަށް ބޮޑެތި ގެއްލުންތަކެއް ލިބިފައިވާ ކަަމަށް މިނިސްޓްރީން ބުންޏެވެ.
"މިއީ މި މިނިސްޓްރީން 29 ޖޫން 2016 އިން އާންމުކޮށް އަންގާ އިއުލާން ކުރެވިފައިވާ ކަމެއް ކަމުގައިވީ ނަމަވެސް މި އެންގުމާއި ހިލާފަށް އަދިވެސް ބައެއް ފަރާތްތަކުން އަމަލުކުރަމުން ގެންދިއުމުގެ ސަބަބުން ނެރުމަތި ގަދަވާ ހާލަތްތަކުގައި އުޅަނދު ފަހަރާއި، މުދަލާއި، މީހުނަށް ހިތާމަވެރި ހާދިސާތަކެއް ދިމާވެފައިވޭ،" މިނިސްޓްރީން ބުންޏެވެ.
އިންޑަސްޓްރިއަލް ވިލެޖްގެ މަސައްކަތް ކުރަންދާތީ މިދިޔަ އަހަރު ޖޫން މަހު ވަނީ ދެކުނު ފަރާތު ފަޅުތެރެއަށް ވަންނަން އާ ނެރެއް އެ ސަރަހައްދުގައި ކަނޑާފަ އެވެ. ނެރު ބޭނުން ކުރަން ފެށިފަހުން އެތަނުން ވަނީ ވަރަށް ގިނަ ނުރައްކާތެރި ހާދިސާތަކެއް ހިނގާފަ އެވެ. މިދިޔަ ހަފްތާގައި ވެސް ވަނީ ނުރައްކާތެރި ހާދިސާތަކެއް ހިނގައި ބަޔަކަށް އަނިޔާ ވެފަ އެވެ.