ސިއްހީ ނިޒާމް ހަރުދަނާ ކުރުމަށްޓަކައި ވަރަށް ބޮޑު ހޭދައެއް މި ސަރުކާރުން ކުރަމުންދާ ކަމަށާއި އެގޮތުން ސިއްހީ ނިޒާމަށް ހަރަދުކުރާ ވަރު، 130 ޕަސެންޓަށް އިތުރުވެފައިވާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެ އެވެ.
ޕެރަޑައިސް އައިލެންޑް ރިސޯޓްގައި މިއަދު ހެނދުނު ފެށި ޑަބްލިޔޫއެޗްއޯގެ 70 ވަނަ ސަރަހައްދީ ބައްދަލުވުން ހުޅުވުމުގެ ރަސްމިއްޔާތު ނިންމާލެއްވުމަށްފަހު ބޭއްވި ނޫސް ކޮންފަރެންސްގައި މިނިސްޓަރު ވިދާޅުވީ މި ސަރުކާރުން ސިއްހީ ނިޒާމަށް ހަރަދުކުރާ ވަރު ވަނީ 130 ޕަސެންޓަށް އިތުރުވެފަ ކަމަށާއި ރައްޔިތުންގެ ޖީބުން ސިއްހީ ނިޒާމަށް ކުރަން ޖެހޭ ހަރަދު ވަނީ ވަރަށް ބޮޑުތަން ލުއި ކުރެވިފައި ކަމަށެވެ. އަދި ސިއްހީ ކަންކަން ރަނގަޅު ކޮށްގެން ނޫނީ ރައްޔިތުންނަށް އެހެނިހެން ހިދުމަތްތައް ފޯރުކޮށް ނުދެވޭނެ ކަމަށާއި އެގޮތުން 2018 ނިމޭއިރު ރާއްޖެވާނީ މި ރީޖަންގައި އެމްއާރްއައި މެޝިން އެންމެ ގިނަ ގައުމަށް ކަމަށް މިނިސްޓަރު ވިދާޅުވި އެވެ.
ސަރުކާރުން 26 ޕަސަންޓް ހޭދައެއް ކުރަނީ ސިއްހީ ނިޒާމް ހަރުދަނާ ކުރުމަށެވެ. ރާއްޖެއަކީ މި ރީޖަންގައި ސިއްހީ ނިޒާމަށް އެންމެ ބޮޑު ހޭދައެއް ކުރާ ގައުމެވެ.
"ކޮންމެ ރައްޔިތަކަށް އަހަރަކު 810 ޑޮލަރު ސަރުކާރުން މިހާރު ހަރަދުކުރޭ، އެއީ މެދު މިނެއްގެ އާމްދަނީއެއް ލިބޭ އެހެން ގައުމުތަކާ އަޅާބަލާއިރު ދެ ގުނަ އިތުރު އަދަދެއް،" މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ ސިއްހީ ނިޒާމް ހަރުދަނާ ކުރުމަށް ސަރުކާރުން ވަރަށް ބޮޑު ހޭދައެއް ކުރަމުންދާ ކަމަށާއި އެގޮތުން އެންމެ ބޮޑު ހޭދައެއް ކުރަނީ އިންފްރާސްޓްރަކްޗާއަށް ކަމަށެވެ. އަދި ރާއްޖެތެރޭގެ އިންފްރާސްޓްރަކްޗާ އަށް ވަރަށް ބޮޑު ހޭދައެއް ކުރަން ޖެހޭ ކަމަށާއި އެގޮތުން 25 ސީ އެމްބިއުލާންސް އާއި 187 ފާމަސީ އޮޕަރޭޓް ކުރާއިރު އެ ފާމަސީގެ މުއައްޒަފުންނާއި އެތަނަށް ވަރަށް ބޮޑު ހޭދައެއް ކުރަން ޖެހޭ ކަމަށް މިނިސްޓަރު ވިދާޅުވި އެވެ.
"2018 ނިމޭއިރު ރާއްޖެވާނީ މި ރީޖަންގައި އެމްއާރްއައި މެޝިން އެންމެ ގިނަ ގައުމަށް، ހުޅުމާލެ ހޮސްޕިޓަލްގައި މެޝިނެއް، ޓްރީޓޮޕްގައި މެޝިނެއް، ކުޅުދުއްފުށީގައި ތަރައްގީކުރާ ޓާޝަރީ ހޮސްޕިޓަލްގައި އެމްއާރްއައި މެޝިނެއް ބެހެއްޓިގެންދާނެ އަދި އައްޑޫގައި ތަރައްގީ ހޮސްޕިޓަލްގައާ އައިޖީއެމްއެޗްގައި މިހާރު ގާއިމް ކުރާ 25 ބުރީގެ އިމާރާތުގައި އިތުރު އެމްއާރްއައި މެޝިނެއް ބެހެއްޓޭނެ، މިކަމުގެ ސަބަބުން ކިއު ކުޑަވެގެންދާނެ ކަން ފާހަގަ ކުރަން،" މިނިސްޓަރު ވިދާޅުވި އެވެ. "ނިޒާމެއްގެ ތެރެއިން ކަށަވަރު ކުރާ ކަމަކީ އެމެޖެންސީ ކޮށް ދައްކަން ބޭނުންވާ ފަރާތްްތަކަށް ޑޮކްޓަރުން ޕްރޮރަޓައިޒް ކުރާ ލިސްޓަކުން އެމްއާރްއައި ނުހެދި ނުހުންނާނެ، ވެއީޓް ލިސްޓް ކުރަނީ ހަމަ ރައްޔިތުންނަށް ހިދުމަތް ދިނުމުގައި ނިޒާމެއްގެ ދަށުން ޑޮކްޓަރުން ޕްރެއޮރަޓައިޒް ކުރާ ލިސްޓެއްގެ ދަށުން، ރަނގަޅު ފެންވަރެއްގައި ފޯރުކޮށް ދިނުމަށްޓަކައި،"