ތ. ގުރައިދޫއިން ފުރައިގެން އެ އަތޮޅު މާލެ ފުށި ރިސޯޓަށް ދަތުރުކުރި ދޯންޏެއް އިންޖީނު ހުއްޓިގެން ގުރައިދޫ ފަރަށް އަރައިފި އެވެ.
ގުރައިދޫ ކައުންސިލުން ބުނީ އެރަށުން ފުރައިގެން މާލެފުށި ރިސޯޓަށް ދަތުރުކުރި ދޯންޏެއް އިންޖީނު ހުއްޓިގެން އުޅޭ ކަމުގެ މައުލޫމާތު ލިބިފައިވަނީ މިއަދު ހަވީރު 4:45 އެހާއިރު ކަމަށާއި ހަބަރު ލިބުމާއެކު ދޯނީގައި ދަތުރު ކުރަމުންދިޔަ މީހުންް ސަލާމަތްކުރުމުގެ މަސައްކަތް ފެށުނު ކަމަށެވެ. އަދި އެއްވެސް މީހަކަށް ގެއްލުމެއް ނުލިބި އެންމެން ގުރައިދޫ އަށް ގެނެވިފައިވާ ކަމަށާއި ދޯނި ފަރަށް އަރާފައިވަނީ މިއަދު ހަވީރު 5:30 އެހާއިރު ކަމަށް ކައުންސިލުން ބުންޏެވެ.
ކައުންސިލުން ބުނީ ދޯނީގެ އިންޖީނު ހުއްޓުމާއެކު ނަގިލި ލައިގެންވެސް ދޯނި ހިފެހެއްޓޭތޯ މަސައްކަތް ކުރި ކަމަށާއި ނަމަވެސް ދޯނި ކޮންޓްރޯލްނުވެގެން އެރަށު ފަރަށް އެރީ ކަމަށެވެ. އަދި ދޯނި ފުން ކުރުމުގެ މަސައްކަތުގައި އެރަށު ރައްޔިތުންނާއި ގުރައިދޫ ޕޮލިސް ސްޓޭޝަންގެ އިތުރުން މާލެފުށި ރިސޯޓުން ހަރަކާތްތެރިވަމުންދާ ކަމަށެވެ. ފަރަށް އަރާފައިވަނީ ތ. ދިޔަމިނގިލި ދޯންޏެއް ކަމަށް ވެސް ކައުންސިލުން ބުންޏެވެ.
"ގުރައިދޫއިން ފުރައިގެން މިރަށު ކައިރީގައި އޮންނަ މާލެފުށި ރިސޯޓަށް ދަތުރު ކުރި ދޯންޏެއް އިންޖީނު ހުއްޓިގެން އުޅޭ ކަމުގެ މައުލޫމާތު ލިބުމާއި ގުޅިގެން އެ ސަރަހައްދަށް ދިޔަ އިރު ދޯނި ނަގިލި ލައިގެން މައިތިރި ކުރެވޭތޯ މަސައްކަތް ކުރަމުންދިޔަ، އެކަމަކު ނަގިލި ކަހައިގެން ދާތީވެ ދޯނި މައިތިރިއެއް ނުވި، އަޅުގަނޑުމެން އަވަސް ކުރީ އޭގައި ތިބި މީހުން ސަލާމަތް ކުރުމަށް، އެ އެންމެންވެސް މިހާޜު ވަނީ މިރަށަށް ގެނެވިފައި، އެއްވެސް މީހަކަށް ގެއްލުމެއް ނުލިބެ، ބަލަން ތިއްބައި ދޯނި ގޮސް ފަރަށް އެރީ، ގާތްގަނޑަކަށް 5:30 އެހާއިރު" ކައުންސިލުން ބުންޏެވެ.
ގުރައިދޫ ޕޮލިސް ސްޓޭޝަނުން ބުނީ ދޯންޏެއް ފަރަށް އަރައިގެން އުޅޭ ކަމުގެ މައުލޫމާތު ލިބިފައިވާ ކަމަށާއި ނަމަވެސް އެކަމާއި ގުޅޭ މައުލޫމާތު އަދި ދެވެން ނެއް ކަމަށެވެ.