ރައްޔިތުން މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫން ހައްޔަރު ކޮށްފައިވަނީ އެއްވެސް ހެއްކެއް ގަރީނާއެއް ނެތި ގާނޫނީ އިމުގެ ބޭރުން ސިޔާސީ މަންފާ ހާސިލް ކުރުމަށް ކަމަށާއި އެމަނިކުފާނު މިހާރުން މިހާރަށް ދޫކޮށްލުމަށް ގުޅިފައިވާ ސިޔާސީ ޕާޓީތަކުން ގޮވާލައިފި އެވެ.
ގުޅިފައިވާ ސިޔާސީ ޕާޓީތަކުން ނެރުނު ނޫސްބަޔާނެއްގައި ބުނީ، ފާރިސް ހައްޔަރު ކޮށްފައިވަނީ ރައްޔިތުންގެ މަޖިލީހުގެ މެންބަރުންނަށް ރިޝްވަތު ދިން ކަމަށް ބުނާ މައްސަލައެއްގައި އެއްވެސް ހެއްކެއް ގަރީނާއެއް ނެތި ގާނޫނީ އިމުގެ ބޭރުން، ސިޔާސީ މަންފާ ހާސިލް ކުރުމަށް ކަމަށެވެ. އަދި ނުކުރާ ކުށަކަށް ނުފަށާ ޝަރީއަތަކަށް ބޭއިންސާފުން އެމަނިކުފާނަށް އަނިޔާ ލިބެމުންދާތާ މިއަދަށް 50 ދުވަސް ވެފައިވާ ކަމަށް އިދިކޮޅުން ބުންޏެވެ.
އިދިކޮޅުން ބުނީ ފާރިސްގެ މައްޗަށް ތުހުމަތުތަކެއް ކޮށްފައިވަނީ ގުޅިފައިވާ ސިޔާސީ ޕާޓީތަކުގެ ރައްޔިތުންގެ މަޖިލީހުގެ 45 މެންބަރުންގެ ސޮޔާއެކު، މަޖިހިލީހުގެ ރައީސްގެ އިތުބާރު ނެތްކަމުގެ މައްސަލައިގައި ސޮއި ކުރެއްވި މެންބަރުންނަށް ރިޝްވަތު ދެއްވި ކަމަށް ބުނާ އިންޓެލް ރިޕޯޓެއްގެ މައްޗަށް ކަމަށް ބުނެ ކަމަށެވެ. ނަމަވެސް މިއަދާއި ހަމައަށް އެއްވެސް މެންބަރަކަށް ފާރިސް މައުމޫން ރިޝްވަތު ހުށަހަޅުއްވާފައި ނުވާނެކަމަށާއި އެ މެންބަރުން އިތުބާރު ނެތްކަމުގެ މައްސަލައިގައި ސޮއި ކޮށްފައިވަނީ އެ މެންބަރުންގެ އަމިއްލަ އިހުތިޔާރުގައި އެއްވެސް ނުފޫޒެއް ނެތި ކަމަށް އެ މެންބަރުން ވިދާޅުވަމުންދާ ކަމަށް އިދިކޮޅު ފަރާތްތަކުން ބުންޏެވެ.
"ސިޔާސީ ބައެއް ފަރާތްތަކުން މީޑިއާގައި އަދި ސިޔާސީ އެކި ޕޯޑިއަމްތަކުގައި ރިޝްވަތު ފައިސާ ބެހިކަމަށާއި އަދި އެފައިސާ ބޭނުންކޮށްފައިވާނެ ކަމަށް އެއްބަސްވެފައި ވާއިރުވެސް، މިމައްސަލަތައް ދައުލަތުގެ އެއްވެސް މުއައްސަސާއަކުން ބަލައި ފިޔަވަޅެއް އަޅާފައި ނުވޭ، އަދި މީގެން ބައެއް މައްސަލަ ތަކަކީ އެކި އެކި މުއައްސަސާ ތަކަށް ހުށަހަޅާފައިވާ މައްސަލަ ތަކެއް، އެހެން ނަމަވެސް ރިޝްވަތުގެ އެއްވެސް އަމަލެއް ހިންގާފައި ނުވާނެކަމަށް ބުނާއިރު އަދި އެއްވެސް ހެއްކެއް ގަރީނާއެއް ނެތި ފާރިސް ވަނީ ނުފަށާ ޝަރީއަތަކަށް، ވަކި މުއްދަތެއް ނެތް ގޮތަށް، ޝަރީއަތް ނިމެންދެން ސިޔާސީ ބޭނުމަކަށްޓަކައި ޖަލުގައި ބަންދުކުރެވިފަ،" ބަޔާނުގައި ވެއެވެ.
ބަޔާނުގައި އިތުރަށް ބުނީ، ފާރިސް ބަންދު އަމުރު ހައިކޯޓުގައި އިސްތިއުނާފުކޮށް އެ މައްސަލައިގެ ޝަރީއަތް ނިމި ހައިކޯޓުން ގޮތެއް ނުނިންމައި އޮންނަތާ 27 ދުވަސް ވެފައިވާ ކަމަށާއި އެމައްސަލަވެސް ގޮތެއް ނުނިމި ލަސްވެގެން ދަނީ ވަކި ބައެއްގެ ސިޔާސީ ނުފޫޒު ކޯޓު ތަކަށް ފޯރުވައި އެ މައްސަލަ ހިފަހައްޓަވާފައި ވާތީ ކަމަށެވެ. އަދި ފާރިސް ހައްޔަރުކޮށް، ހެދިފައިވާ ގާނޫނު ތަކުގެ ބޭރުން އަމަލު ކުރަމުން ގެންދަވާތީ އެކަން ހަރުކަށި އިބާރާތުން ކުށްވެރި ކުރާ ކަމަށްވެސް އިދިކޮޅު ފަރާތްތަކުން ބުންޏެވެ.
"ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫން ހައްޔަރުކޮށް، ހެދިފައިވާ ގާނޫނު ތަކުގެ ބޭރުން އެމަނިކުފާނާއި ދޭތެރޭގައި އަމަލު ކުރަމުން ގެންދަވާތީ އެކަން އެންމެ ހަރުކަށި އިބާރާތުން ކުށްވެރިކޮށް އެމަނިކުފާނު މިހާރުން މިހާރަށް ދޫކޮށްލުމަށް ގުޅިފައިވާ ސިޔާސީ ޕާޓީތަކުން ގޮވާލަން، ސިޔާސީ މަގްސަދެއް ހާސިލު ކުރުމަށް އެކިއެކި ތުހުމަތުގައި ހުކުމް އިއްވާފައިވާ އެންމެހާ ފަރާތްތައް މިހާރުން މިހާރަށް ދޫކޮށްލުމަށްވެސް މިފުރުސަތުގައި ގޮވާލަން،" ބަޔާނުގައި ވެއެވެ.