ގައިން ގައިން ނާރާ ބަލިތައް ކޮންޓްރޯލް ކުރުމުގެ ގޮތުން "25 އަށް 25" ގެ ނަމުގައި ހެލްތް ޕްރޮޓެކްޝަން އޭޖެންސީގެ ފަރާތުން ކެމްޕޭނެއް ފަށައިފި އެވެ.
25 އަށް 25ގެ ނަމުގައި ފެށި އެންޑީސީ ކެމްޕޭނެ އިފްތިތާހު ކޮށްފައިވަނީ ދިވެހިރާއްޖޭގެ އާއްމު ސިއްހަތުގެ ކާމިޔާބީތަކާއެކު ކުރިއަށް ނަމުގައި އިއްޔެއް ޕެރެޑައިސް އައިލޭންޑް ރިސޯޓްގައި ބޭއްވި ރަސްމިއްޔާތެއްގައި އެވެ. ހެލްތް މިނިސްޓްރީން ބުނީ އެ ކެމްޕޭނުގެ ޒަރިއްޔާއިން ދައުލަތުގެ އެންމެހާ މުއައްސަސާތަކާއި މަދަނީ ޖަމިއްޔާތަކާއި ގުޅިގެން ހެލިފެލިވެ ކަސްރަތުކުރުމާއި ދުންފަތުގެ އިސްތިއުމާލުކުރުން މަދުކުރަން މިހާރު ކުރިއަށްގެންދާ ހޭލުންތެރި ކުރަން ކުރަމުންދާ މަސައްކަތްތައް ހަރުދަނާކޮށް އިތުރު މުހިއްމު މަސައްކަތްތަކެއް ކުރެވިގެންދާނެ ކަމަށެވެ.
މިނިސްޓްރީން ބުނީ ރާއްޖޭގައި އަހަރެއްގެ މައްޗަށް މަރުވާ މީހުންގެ 81 ޕަސެންޓަކީ ގައިން ގައިން ނާރާ ބަލިތަކުގެ ސަބަބުން މަރުވާ މީހުން ކަމަށާއި އެ ކެމްޕޭނުގެ ސަބަބުން ގައިން ގައިން ނާރާ ބަލިތައް ކޮންޓްރޯލް ކޮށް މަދުކުރަން ކުރާ ގައުމީ މަސައްކަތަށް އިތުރު ބޮޅެއް އިތުރު ވެގެންދާނެ ކަމަށެވެ. އަދި އެ ބަލިތަކަކީ ދިރިއުޅުމުގެ ވައްޓަފާޅިތަކާއި ވަރަށް ބޮޑަށް ގުޅިފައިވާ ބަލިތަކެއް ކަމަށާއި އެ ބަލިތައް ކޮންޓްރޯލް ކުރެވޭނީ ފަރުދީ އެއްބާރުލުމާއި ސަރުކާރުގެ މުއައްސަސާތަކާއި މަދަނީ އެކިއެކި ޖަމިއްޔާތަކުގެ އެއްބާރުލުމާ ލައިގެން ކަމަށް މިނިސްޓްރީން ބުންޏެވެ.
"ރާއްޖޭގައި އަހަރެއްގެ މައްޗަށް މަރުވާ މީހުންގެ 81 ޕަސެންޓަކީ ގައިން ގަޔަށް ނާރާ ބަލިތަކުގައި މަރުވާ މީހުން، އެންމެ އާންމު ބަލިތަކަކީ ހިތުގެ ބައްޔާއި ސްޓޯރޯކާއި ކެންސަރުބައްޔާއި ފުއްޕާމޭގެ ބަލިތަކުގެ އިތުރުން ހަކުރު ބަލިތައް، އަދި ދުންފަތުގެ އިސްތިއުމާލު ކުރާ މީހުންނާއި ފައިދާހުރި ކާނާ ބޭނުން ނުކުރާ މީހުންނާއި ހަށިގަނޑަށް ބޭނުންވާ މިންވަރަށް ހެލިފެލިވެ ނޫޅޭ މީހުން ދަނީ ނިސްބަތުން އިތުރުވަމުން" މިނިސްޓްރީން ބުންޏެވެ.
އިއްޔެ ބޭއްވި ރަސްމިއްޔާތުގައި ރާއްޖެއިން ހިމަބިހި ނައްތާލެވިފައިވާތީ އެކަމުގެ އަގުވަޒަން ކުރުމުގެ ގޮތުން ހަނދާނި ފިލައެއްވެސް އަރުވާފައި ވެއެވެ. އަދި ދިވެހި ގޭބިސީތަކުގައި ދިރިއުޅޭ މީހުންނަށް ހިތްވަރު ދިނުމުގެ ގޮތުން ދުންފަތުގެ އިސްތިއުމާލު ނުކުރާ ގޭބިސީތަކަށް އިނާމު ދޭން ނިންމާފައި ވެއެވެ. އަދި ދުންފަތުގެ ވިޔަފާރި ނުކުރާ ނުވަ ފަރާތަކަށް ވެސް އިނާމު ދޭން ނިންމާފައި ވެއެވެ.