ބޮޑެތި ބޯޓު ފަހަރު ޖެއްސޭ ގޮތަށް ގއ. ކޫއްޑޫ އެއާޕޯޓު ތަރައްގީ ކުރުމަށް ފަހު ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް އެ އެއާޕޯޓް ރަސްމީކޮށް މިއަދު ހަވީރު ހުޅުވާ ދެއްވައިފި އެވެ.
ކޫއްޑޫ އެއާޕޯޓަށް ބަދަލުތައް ގެނެސް ތަރައްގީކޮށް ނިންމި އިރު އެ އެއާޕޯޓުގެ 1200 މީޓަރުގެ ރަންވޭ މިހާރު ވަނީ 1800 މީޓަރަށް ބޮޑުކޮށްފަ އެވެ. އެގޮތުން ބޮޑެތި ބޯޓު ފަހަރާއި 17 ސީޓުގެ ޖެޓުތައް ޖެއްސޭ ގޮތަށް އެއާޕޯޓު ވަަނީ ތަރައްގީކޮށްފަ އެވެ. އޭގެ އިތުރުން ފަސްޓް ކްލާސްގެ ވީއައިޕީ އަދި ސީއައިޕީ ލޮންޖަކައި ދެ އެކޮމޮޑޭޝަން ބްލޮކް ވެސް ކޫއްޑޫ އެއާޕޯޓުގައި ތަރައްގީކޮށްފައި ވެއެވެ.
މި ބަދަލުތަކާއެކު ކޫއްޑޫ އެއާޕޯޓް ވަނީ ކެޓަގަރީ 2 ސީ ގެ އެއާޕޯޓަކުން ކެޓަގަރީ 3 ސީ ގެ އެއާޕޯޓަކަށް ބަދަލުވެފަ އެވެ. ބޮޑެތި ފްލައިޓްތައް ޖެއްސޭ ވަރަށް އެއާޕޯޓް ތަރައްގީކުރީ ސިންގަޕޫރުގެ ކިއޮންހޮންގް ކޮންސްޓްރަކްޝަން އާއި ރާއްޖޭގެ ރިސޯޓް އެންޑް ހޮޓެލް ކޮންސްޓްރަކްޝަން ކޮމްޕެނީންނެވެ. މިއަދު ބޭއްވި ރަސްމިއްޔާތުގައި ކޫއްޑޫ އެއާޕޯޓުގެ ސީއީއޯ މުހައްމަދު ޢަލީ ޖަނާޙާއި، ޕްރިސްޓިން އައިލެންޑް އިންވެސްޓްމަންޓް ޕްރައިވެޓް ލިމިޓެޑްގެ ޗެއާމަން މރ. ރޮނަލްޑް ލިއޯ ބައިވެރިވެވަޑައިގެންނެވި އެވެ.