ޑޮމެސްޓިކް ތިން އެއާޕޯޓަކަށް ބޭނުންވާ ވެހިކަލާއި އިކުއިޕްމަންޓް ގަނެދޭނެ ބަޔަކު ހޯދަން ފިނޭންސް މިނިސްޓްރީން އިއުލާންކޮށްފި އެވެ.
ފިނޭންސުން ހޯދަން އިއުލާން ކޮށްފައިވަނީ ހދ. ކުޅުދުއްފުއްޓާއި ގދ. މާވާރުލުގެ އިތުރުން ށ. ފުނަދޫ އެއާޕޯޓްގެ އޮޕަރޭޝަނަލް މަސައްކަތްތަކަށް ބޭނުންވާ ބައެއް އިކުއިޕްމަންޓާއި ވެހިކަލް ހޯދައިދޭނެ ބައެކެވެ. އެގޮތުން އެ އެއާޕޯޓްތަކަށް ބޭނުންވާ ފަޔާ ލޮރީ، ފަޔާ ފައިޓިން އިކުއިޕްމަންޓްތަކާއި އޮޕަރޭޝަނަލް އިކުއިޕްމަންޓްގެ އިތުރުން ނެވިގޭޝަނަލް އަދި މެޓް އިކުއިޕްމަންޓްސް ސަޕްލައި އެންޑް ޑެލިވަރީގެ މަސައްކަތް ކުރަން ބޭނުންވާ ފަރާތްތަކުން އަންނަ މަހުގެ 14 ވަނަ ދުވަހުގެ ކުރިން ބީލަން ހުށަހެޅުމަށް އެ މިނިސްޓްރީން ވަނީ އެދިފަ އެވެ.
ބީލަމުގައި ބައިވެރިވެވޭނީ 1500 ރުފިޔާގެ ފީއެއް ދެއްކުމުންނެވެ.
ބިޑް ސެކިއުރިޓީ ޕީގެ ގޮތުގައި އެކި ޕްރޮޖެކްޓްތަކަށް ކަނޑައަޅާފައިވަނީ އެކި އަދަދުތަކެވެ. ބިޑް ސެކިޔުރިޓީ ދެއްކުމުގެ މުއްދަތަކީ ބިޑް ހުޅުވާ ތާރީހުންފެށިގެން 148 ދުވަހެވެ. ޕާފޯމަންސް ސެކިޔުރިޓީގެ ގޮތުގައި ހުށަހަޅަންޖެހޭނީ ކޮންޓްރެކްޓް އަގުގެ ފަސް ޕަސެންޓެވެ. އަދި އެޑްވާންސް ޕޭމަންޓް ގެރެންޓީއެއް ހުށަހެޅުމުން އެޑްވާންސް ޕޭމަންޓްގެ ގޮތުގައި ކޮންޓްރެކްޓް އަގުގެ 15 ޕަސެންޓް ވެސް ލިބޭނެއެވެ.
އިއްޔެ އިއުލާންކޮށްފައިވާ ޕްރޮޖެކްޓުތަކުގެ ޕްރީބިޑް ބައްދަލުވުން އޮންނާނީ މާޗް މަހުގެ ފަސް ވަނަ ދުވަހުގެ ފިނޭންސް މިނިސްޓްރީގަ އެވެ. ބިޑް ފޮތް ވެސް އެމިނިސްޓްރީން ދޫކުރާނެ އެވެ.