މ. މުލީ އެއާޕޯޓަށް އަންނަ އަހަރުގެ މާޗް މަހު ޓެސްޓް ފްލައިޓް ޖެއްސުމަށް މަސައްކަތް ކުރަމުންދާ ކަމަށް ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) އިން ބުނެފި އެވެ.
ދައުލަތުގެ މީޑިއާގައި ވާހަކަ ދައްކަވަމުން އާރްއޭސީއެލްގެ މެނޭޖިން ޑިރެކްޓަރު އަހުމަދު މުބީން ވިދާޅުވީ މުލީ އެއާޕޯޓްގެ މަސައްކަތް ނިންމައި މާޗް ފުރަތަމަ ދުވަހު ޓެސްޓް ފްލައިޓް ޖެއްސުމަށް މަސައްކަތް ކުރަމުންދާ ކަމަށެވެ.
މުބީން ވިދާޅުވި ގޮތުގައި މިހާރު ކުރިއަށްދަނީ އެއާޕޯޓް ހުޅުވުމަށް ވާންޖެހޭ ފަހުގެ ތައްޔާރީތަކެވެ.
އެ ގޮތުން އެއާޕޯޓަށް ބޭނުންވާ ވެހިކަލާއި މެޝިނަރީ ހޯދުމުގެ އިތުރުން އޮފީސް ބައިގެ މަސައްކަތް ނިންމުމާއި އަލިފާން ނިއްވުމަށް މީހުން ނަގައި ތަމްރީންކުރުމުގެ މަސައްކަތް ކުރަމުންދާ ކަމަށް މުބީން ވިދާޅުވި އެވެ.
މުލީ އެއާޕޯޓުގެ މަސައްކަތް ފަށާފައިވަނީ 2021 ވަނަ އަހަރު އެވެ.
މި އެއާޕޯޓަކީ 1،200 މީޓަރު ދިގު އަދި 30 މީޓަރު ފުޅާ ރަންވޭއަކާއެކު ތަރައްގީކުރާ އެއާޕޯޓެކެވެ.