އެމްޑީޕީ ދޫކޮށް ޕީޕީއެމަށް ބަދަލު ނުވާނެ ކަމަށް ރައްޔިތުންގެ މަޖިލީހުގެ މެންބަރު އިބްރާހިމް ޝަރީފް (މަވޯޓާ ޝަރީފު) ވިދާޅުވެއްޖެ އެވެ.
އޭނާ މިހެން ވިދާޅުވީ އޭނާ ޕީޕީއެމަށް ބަދަލުވެވަޑައިގަންނަަވާ ކަމަށާއި އަދި އިދިކޮޅުގެ ބައެއް އެހެން މެންބަރުން ވެސް ޕީޕީއެމާ ގުޅި ވަޑައިގަންނަވާ ކަމަށް އަޑުތައް ފެތުރިފައި ވަނިކޮށެވެ.
ޝަރީފު މިއަދު ވިދާޅުވީ އޭނާ ހުންނެވި ޕާޓީ ދޫކުރައްވައި ޕީޕީއެމަށް ވަޑައި ނުގަންނަވާނެ ކަމަށާއި އޭނާއަކީ އެއްވެސް އުޖޫރައެއް ހޯއްދަވައިގެން ޕާޓީ ބަދަލު ކުރަން ގަސްދު ކުރައްވާ ބޭފުޅެއް ނޫން ކަމަށެވެ.
އަދި ވިދާޅުވީ ކަމެއްގައި މީހަކު ހިޔާލެއް ފާޅޔ ކުރުމަކީ ސަރުކާރަށް ތާއީދު ކުރުން ނޫން ކަމަށެވެ. އަދި އޭނާ އަކީ އިދިކޮޅު އެމްޑީޕީގެ މެންބަރެއްގެ ގޮތުގައި ސބިތުވެ ހުންނަވާނެ ކަމަށެވެ.
މަޖިލީހުގެ މަރަދޫ ދާއިރާގެ މެންބަރު ޕީޕީއެމަށް ބަދަލުވާ ކަމަށް އަޑުތައް ފެތުރުނީ ބައެއް މައްސަލަތަކުގައި އޭނާާ ސަރުކާރުގެ ސްޓޭންޑާ އެއްކޮޅަށް ވާހަކަފުޅު ދައްކަވާ ބައެއް ޓްވީޓްތައްވެސް ކުރައްވާތީ އެވެ. އެ ގޮތުން އޭނާ ވަނީ މައްސަލަ އުފެދިގެން އުޅޭ ބޯޓްގެ މައްސަލާގައި ވެސް ސަރުކާރަށް ތާއީދު ލިބޭ ގޮތަށް ވާހަކަފުޅު ދައްކަވާފައެވެ.
ޕީޕީއެމްގެ ބައެއް މަޖިލިސް މެންބަރުން މިދިއަ ހަފުތައެއްހާ ދުވަހުގެ ތެރޭގައި އެކި ފަހަރު މަތިން އިދިކޮޅު ބައެއް މެންބަރުން ޕީޕީއެމާ ގުޅެން ނިންމާފައިވާ ކަމަށް ބުނެފައި ވެއެވެ.