ރައްޔިތުންގެ މަޖިލީހުގެ ތެރެއިން ދިވެހި ރައްޔިތުންނަށް ސަރުކާރުން އިއްޔެ ދައްކާލީ ބޭނުންއިރަކު ގާނޫނުއަސާސީއާ ކުޅެލެވިދާނެ ކަމާއި ސަރުކާރުގެ ހުދުމުހުތާރުކަން ހުރި މިންވަރު ކަމަށް އިދިކޮޅު އެމްޑީޕީން ބުނެފި އެވެ.
ރައްޔިތުންގެ މަޖިލީހުން އިއްޔެ ވަނީ މެންބަރަކު އިންތިހާބުވި ޕާޓީއަކުން ވަކިވެއްޖެނަމަ އަދި އެ ޕާޓީއަކުން ވަކިކޮށްފި އަދި އަމިއްލަ ގޮތުން އިންތިހާބުވި މެންބަރަކު ޕާޓީއަކާ ގުޅިއްޖެނަމަ އެ މެންބަރެއްގެ ގޮނޑި ގެއްލޭނެ ކަމަށް ބުނާ ގޮތްތަކެއް ހިމަނައިގެން ގާނޫނުއަސާސީ އިސްލާހުކޮށްފަ އެވެ.
މިކަމާ ގުޅިގެން ނޫސްވެރިންނާ މިއަދު ބައްދަލުކުރައްވާ އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުން އިއްޔެ ރައްޔިތުންނަށް ދައްކާލީ މިސަރުކާރުގެ ހުދުމުހުތާރުކަން ހުރި މިންވަރު ކަމަށެވެ. ނަމަވެސް ތާއަބަށް ހުދުމުހުތާރުކަން ދައްކަން ރައްޔިތުން މަޑުން ނުތިބޭނެކަންވެސް ފައްޔާޒު ހަނދާންކޮށްދެއްވި އެވެ. ރައްްޔިތުންގެ ބާރު އަލުން ހޯދައިދޭނެ ކަމުގައިވެސް ވިދާޅުވި އެވެ.
"އަޅުގަނޑުމެންނަށް މިކަން މިގޮތަށް ކުރުން ހުއްޓުވަން ކުރެވޭނެ ހުރިހާ ކަމެއް ކުރާނެ ކަމުގެ ޔަގީންކަން ރައްޔިތުންނަށް އަރުވަން،" ފައްޔާޒު ވިދާޅުވި އެވެ.
އޭނާ ވިދާޅުވީ މެންބަރަކު ޕާޓީގެ ޓިކެޓްގައި އިންތިހާބުވުމަށްފަހު ޕާޓީ ބަދަލުކުރާނަމަ ގޮނޑި ގެއްލޭ ގޮތަށް އޮތުމަކީ އެމްޑީޕީ އަބަދުވެސް ގަބޫލުކުރާ އުސޫލެއް ކަމަށެވެ. ނަމަވެސް އިއްޔެ ގާނޫނުއަސާސީއަށް ހުށަހެޅި އިސްލާހެއްގައި މެންބަރަކު ހުންނަ ޕާޓީން ވަކިކޮށްފިނަމަ އެ މެންބަރެއްގެ ގޮނޑި ގެއްލޭ ގޮތަށް އޮންނަ އޮތުމަކީ އެއްވެސް ހަމައެއް އެއްވެސް އުސޫލެއް ނެތި ދޫކޮށްލާފައި ބޭއްވޭނެ ގޮތެއް ނޫން ކަމަށާއި އެހަމަ ގަބޫލުނުކުރައްވާނެ ކަމަށްވެސް ވިދާޅުވި އެވެ. ގާނޫނުއަސާސީއަށް އިއްޔެ ގެނައި އިސްލާހުތަކާ އެކު މެންބަރުން މަސައްކަތް ކުރަންޖެހޭ ގޮތުގެ މިނިވަންކަން ގެއްލި މެންބަރުން ތަޅުއެޅުވިފައިވާ ކަމަށްވެސް ވިދާޅުވި އެވެ. އެމްޑީޕީއަށް މެޖޯރިޓީ ލިބިއްޖެނަމަ އިއްޔެ ގާނޫނުއަސާސީއަށް ގެނައި އިސްލާހުތަކަށް ބަދަލުތަކެއް ގެންނާނެ ކަމަށްވެސް ވިދާޅުވި އެވެ.
"ޕާޓީން ވަކިކޮށްފި ހާލަތުގައި ގޮނޑި ގެއްލޭނަމަ ރައްޔިތުން އެބަ ބުނަންޖެހޭ އާނއެކޭ އޭނާ ދުރަށް ލާން އެބަޖެހެއޭ،" މެންބަރަކު ޕާޓީން ވަކިކުރާ ހާލަތުގައި ގޮނޑި ގެއްލެންވާނީ ރައްޔިތުންގެ ބަހަކާ އެކު ކަމަށް ވަކާލާތު ކުރައްވަމުން ފައްޔާޒު ވިދާޅުވި އެވެ.
އޭނާ ވިދާޅުވީ އެމްޑީޕީ އަބަދުވެސް މަސައްކަތް ކޮށްފައިވާނީ އަދި މިއަދު ކުރަމުންދަނީ ވެސް ރައްޔިތުންގެ ހައްގުތައް ވީހާވެސް ފުޅާކޮށް ކަށަވަރުކުރެވޭ ގޮތަށް ކަމަށެވެ. ނަމަވެސް ޕީއެންސީގެ ވިސްނުމާއި ފިކުރަކީ ރައްޔިތުން "ތަޅުއެޅުވުން" ކަމަށްވެސް ވިދާޅުވި އެވެ.