ޝަރީއަތް ނިމެންދެން ގޭ ބަންދަށް ބަދަލު ކޮށްފައިވާ ގަލޮޅު ދެކުނު ދާއިރާގެ މެންބަރު އަހުމަދު މަހުލޫފާއި ރާއްޖެއަށާއި ސްރީލަންކާއަށް އެމެރިކާއިން ކަނޑައަޅާފައި ހުންނަވާ ސަފީރުކަމުގެ މަގާމުގައި މިހާރު ހުންނެވީ އަތުލް ކެޝަޕް ބައްދަލު ކުރައްވައިފި އެވެ.
މަހުލޫފް މިއަދު ކުރެއްވި ޓްވީޓެއްގައި ވިދާޅުވީ އޭނާގެގެއަށް ކެޝަޕް ވަޑައިގެން އޭނާއާ ބައްދަލު ކުރެއްވީތީ ޝުކުރު އަދާ ކުރައްވާ ކަމަށެވެ.
ކެޝަޕް އިއްޔެ ވަނީ، ޖަލަށް ލާފައިވާ އިދިކޮޅު ފަރާތްތަކުގެ އަނބިންނާވެސް ބައްދަލު ކުރައްވާފަ އެވެ. އަދި އިދިކޮޅު މެންބަރުންނާ ވެސް އޭނާ ވަނީ އިއްޔެ ބައްދަލު ކުރައްވާފަ އެވެ.
ކެޝަޕް ވަނީ އިއްޔެ ސިޔާސީ ލީޑަރުންނަށާއި ގިނަ ފަރާތްތަކަށް ދައުވަތުދީގެން ހޮޓެލް ޖެންގައި ރޯދަ ވީއްލުމެއްވެސް ބާއްވާފަ އެވެ. ކޮންމެ އަހަރަކުވެސް ބާއްވަމުން އަންނަ އެ ރޯދަ ވީއްލުމަށް ގިނަ ފަރާތްތަކަކުން ބައިވެރިވެފައި ވެއެވެ. ރޯދަ ވީއްލުމުގައި ކެޝަޕް ވިދާޅުވީ، ރާއްޖެއަކީ މި ރީޖަންގައި ދެފުށް ފެންނަ ޑިމޮކްރަސީއެއް އޮތް ގައުމަކަށް ހެދޭނެ ކަމުގެ ޔަގީންކަން އެބައޮތް ކަމަށެވެ. އެކަމަށްޓަކައި އެމެރިކާ އޮތީ ރާއްޖެއާއެކު މަސައްކަތް ކުރަން ތައްޔާރަށެވެ.
ރާއްޖެއާ ގުޅިގެން މަސައްކަތްކޮށް ދެގައުމުގެ ދެމެދުގައި އޮތް ގުޅުން އިތުރަށް ބަދަހި ކުރަން ޖެހޭ ކަމަށާއި އެކަމަށް ތައްޔާރަށް އޮތް ކަމަށް ވެސް ކެޝަޕް ވިދާޅުވި އެވެ.
ރާއްޖެއަށާއި ސްރީލަންކާއަށް ކަނޑައަޅާފައި ހުންނަވާ ސަފީރު ކަމުގެ މަގާމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ އާ ބޭފުޅަކު އައްޔަން ކުރައްވާފަ އެވެ. އައްޔަން ކުރައްވާފައިވަނީ އެލައިނާ ބީ ޓެޕްލިޒް އެވެ. އޭނާ މިހާރު ހުންނެވީ އެމެރިކާއިން ނޭޕާލަށް ކަނޑައަަޅާފައި ހުންނަވާ ސަފީރުކަމުގެ މަގާމުގަ އެވެ.