ރާއްޖޭގައި މިހާރު އިހުސާސް ކުރެވެމުން މިދާ މިނިވަންކަމަކީ ޕާޓީތަކުން ގުޅިގެން ކުރި މަސައްކަތުގެ ނަތީޖާ ކަމަށާއި އެންމެން އެކަތިގަނޑަކަށް ނުވި ނަމަ އެކަން ނުވީސް ކަމަށް މައްޗަންގޮޅި ދެކުނު ދާއިރާގެ މެންބަރު އަބްދުﷲ ސިނާން ވިދާޅުވެއްޖެ އެވެ.
ރައްޔިތުން މަޖިލީހުގެ ގޮނޑި ނުގެއްލޭ ކަމަށް ސުޕްރީމް ކޯޓުން ނިންމުމާ ގުޅިގެން ކޯޓުގެ ބޭރުގައި ނޫސްވެރިންނާ ވަހަކަދައްކަވަމުން ސިނާން ވިދާޅުވީ 13 ވަރަކަށް މަސް ނިމިގެން ދިޔައީ އެއްވެސް ހައްގަކާ ނުލާ ދާއިރާ ތަމްސީލު ނުކުރެވި ކަމަށެވެ. ނަމަވެސް ހަތަރު ލީޑަރުންނާއި ރައްޔިތުން ވެދެއްވި ގުރުބާނީއާއެކު އެ މިނިވަންކަން އަލުން ލިބިފައިވާ ކަމަށާއި ރައްޔިތުންގެ ހައްގުގައި މަޖިލީހުގައި މަސައްކަތް ކުރައްވާނެ ކަމަށް ސިނާން ވިދާޅުވި އެވެ.
ސިނާން ވިދާޅުވީ މިއަދު މިނިވަންކަން އިހުސާސް ކުރެވެނީ ޕާޓީތަކުން ގުޅިގެން އުފެއްދި ރޫހެއްގެ ސަބަބުން ކަމަށެވެ. އަދި އެންމެން އެކަތިގަނޑަކަށް ނުވި ނަމަ އެ މިނިވަންކަން އިހުސާސް ނުވާނެ ކަމަށް ސިނާން ވިދާޅުވި އެވެ.
"އެއްބައިވަންތަކަމާއެކު މި ފެށި މަސައްކަތަކީ ވަކި މީހަކާ ދެކޮޅަށް ނުވަތަ ވަކި މީހަކު ދެކެ ނުހުހިގެން ކުރި މަސައްކަތެއް ނޫން، އަޅުގަނޑުމެންގެ ކުށަކީ ގައުމު އިސްލާހު ކުރަން ޖެހޭކަން ވިސްނުނު ހިސާބުން، އަޅުގަނޑުމެންގެ ގެއިން ވަރަށް ނިކަމެތިކޮށް ނެރެ އެއްލާލެވުނު," ސިނާން ވިދާޅުވި އެވެ.
ކުރިޔަށް އޮތްތަނުގައި ވެސް އިސްލާހީ މަސައްކަތާއެކު ދެގޮތެއް ނުވެ ކުރިޔަށް ދާނެ ކަމަށް ސިނާން ވިދާޅުވި އެވެ. ލިބުނު މިނިވަން ކަމާއެކު މަޖިލީހަށް ވަަދެ، ރައްޔިތުންގެ ހައްގުގައި މަސައްކަތް ކުރައްވާނެ ކަމަށް ވެސް ސިނާން ވިދާޅުވި އެވެ. އަދި އެކި ދާއިރާތަކުން ގެންނަން ޖެހޭ އިސްލާހުތައް ވަރަށް ވެސް ގިނަ ކަމަށާއި ދިވެހިންގެ ކުރި މަގު ބިނާވެފައި ވަނީ އެ އިސްލާހުތަކުގެ މައްޗަށް ކަމަށް އޭނާ ވިދާޅުވި އެވެ. އަދި މި ލިބުނު މިނިވަންކަން ދެމެހެއްޓެން އޮތީ ކަންކަން އިސްލާހުގެ މަގަށް ގެނެސްގެންކަން ސިނާން ފާހަގަ ކުރެއްވި އެވެ.
މީގެ އިތުރުން ސިނާން ވިދާޅުވީ، ކުރިއަށް އޮތްތަނުގައި އެބޭފުޅުންގެ ސިޔާސީ ކުރިމަގު ބައްޓަން ކުރާނެ ގޮތެއް ކަނޑައަޅާނެ ކަމަށާއި ގައުމުގެ މުސްތަގުބަލު ރަނގަޅު ކުރުމަށް ރައްޔިތުންނަށް ހިދުމަތް ކުރުމުގައި ދެމި ހުންނަވާނެ ކަމަށެވެ.
ގޮނޑި ނުގެއްލޭ ކަމަށް ސުޕްރީމް ކޯޓުން ކަނޑައެޅި ތިނަދޫ އުތުރު ދާއިރާގެ މެންބަރު އަބްދުﷲ އަހުމަދު (އަބުޅޯ) ވިދާޅުވީ މިއަދު ސަލާމަތްވީ އަނިޔާވެރިއެއްގެ ވަކިތަކުން ކަމަށެވެ. އަދި އެއީ ދާއިރާގެ ހުރިހާ ރައްޔިތުންނަށާއި ގައުމަށް ލިބުނު ބޮޑު ކާމިޔާބީއެއް ކަމަށް އަބުޅޯ ވިދާޅުވި އެވެ.
"އަޅުގަނޑަކީ އޭރުވެސް މިއަދާ ހަމަޔަށް ވެސް މެންބަރެއް، ހިޔާލު ތަފާތުވުމާއެކު ވެސް އަޅުގަނޑު ގޮނޑި ސަލާމަތްވީ 13 މަހަށް ފަހު، މިކަން ވެގެން ދިޔައީ ގާނޫނުތަކަށް ބޯނުލަނބާ ވެރިއެއްގެ ސަބަބުން މިއީ ދާއިރާގެ ރައްޔިތުންނަާށް ލިބިގެން ދިޔަ ކާމިޔާބީ އެއް," އަބުޅޯ ވިދާޅުވި އެވެ.