މި މަހުގެ 15 ވަނަ ދުވަހު ފްލައިމީ އިން އައްޑު އާއި ފުވައްމުލަކަށް ދަތުރު ފެށުމުގެ ގޮތުން ކޮޅަކަށް 999ރ. އަށް ޓިކެޓު ވިއްކަން ފަށައިފި އެވެ.
ފްލައިމީ އިން ބުނީ އައްޑު / ފުވައްމުލަކަށް ޓިކެޓު ވިއްކުމުގެ ގޮތުން 999ރ. އަށް ޓިކެޓު ވިއްކުން ގެންދާއިރު، މިމަދުން ފެށިގެން އެ އެއާލައިންގެ ވެބްސައިޓުންނާއި ކައުންޓަރުން ވެސް ޓިކެޓު ލިބެން ހުންނާނެ ކަމަށެވެ.
ފްލައިމީ އިން މާލެ/ ފުވައްމުލަކު/ ގަން/ މާލެއަށް ދަތުރުކުރާނީ ހޮނިހިރު ދުވަހާއި ބުދަ ދުވަހު އެވެ. އަދި މާލެ/ ގަން/ފުވައްމުލަކު/ މާލެ އަށް ދަތުރުކުރާނީ ބުރާސްފަތި ދުވަހާއި ހޮނިހިރު ދުވަހު އެވެ.
ފްލައިމީގެ އޮފިޝަލަކު ވިދާޅުވީ މިހާރުގެ އަގުތަކަށްވުރެ ދަތުރު ކުރުމުގެ އަގު ހެޔޮވާނެ ކަމަށެވެ.
"އަގަށް ބަދަލު ގެނައީމަ މި ބަލަނީ އެހެން ފަރާތްތަކުގެ އަގުވެސް ހެޔޮވާނެ ކަމަށް. މިހާރުވެސް ވަރަށް ބޮޑު ޑިމާންޑެއް އެބައޮތް،" އޮފިޝަލް ވިދާޅުވި އެވެ.
މަޝްހޫރު ވިޔަފާރިވެރިޔާ ގާސިމް އިބްރާހިމްގެ ވިލާ އެއާއިން ރާއްޖޭގެ އެތެރޭގެ އުދުހުންތައް ފަށާފައިވަނީ މީގެ ހަތް އަހަރު ކުރިންނެވެ. އެ ކުންފުނިން ދަތުރުކުރަން ބޭނުންކުރަނީ އޭޓީއާރު 500-72 މަރުކާގެ ބޯޓަކާއި އޭޓީއާރު 500-42 މަރުކާގެ ބޯޓެކެވެ. މި އެއާލައިނުން މިހާތަނަށް ދަތުރުކުރަމުން ގެންދިޔައީ ދަރަވަންދޫ އާއި މާމިގިއްޔަށެވެ.
ރާއްޖޭގެ ހުރިހާ ރީޖަނަލް އެއާޕޯޓު ތަކަށް މިހާރު އުދުހެމުން ދަނީ ހަމައެކަނި ގައުމީ އެއާލައިން މޯލްޑިވިއަން އެވެ. މި އަހަރުގެ ޑިސެމްބަރު މަހު "މަންތާ އެއާ" ގެ ނަމުގައި އެތެރޭގެ އުދުހުން ތަކަށް އާ އެއާލައިނެއްގެ ދަތުރުތައް ފަށަން ދަނީ ތައްޔާރުވަމުންނެވެ. ކުޑަހުވަދޫއަކީ ސްޓޭޝަން ވެގެން ތިބެ، މަންތާ އެއާ އިން ފުރަތަމަ އުދުހެން ފަށަނީ ކުޑަހުވަދޫ އާއި ބ. ދަރަވަންދޫ އަދި ތ. ތިމަރަފުށި އައި ވީއައިއޭ އަށެވެ. މި ދަތުރުތައް ފެށުމުގެ ގޮތުން އޭޓީއާރް 600-72 މަރުކާގެ ފުރަތަމަ ބޯޓު އަންނަ މަހުގެ 12 ވަނަ ދުވަހު ރާއްޖެ ގެންނާނެ އެވެ. އަދި އިތުރު ބޯޓެއް އަންނަ އަހަރުތެރޭގައި ރާއްޖެ ގެންނާނެ ކަމަށް އެ އެއާލައިނުން ވަނީ ބުނެފަ އެވެ.