ޕްރައިމަރީގައި ބަލިވިޔަސް އިންތިހާބުގައި ވާދަ ކުރެވޭ ގޮތަށް ސުޕްރީމް ކޯޓުން ނެރުނު ހުކުމަކީ ހިމޭން ބަޣާވާތެއްގެ ގޮތަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ސިފަ ކުރައްވައިފި އެވެ.
މިއަދުގެ މަޖިލީހުގެ ޖަލްސާގައި ވާހަކަ ދައްކަވަމުން އިންތި ވިދާޅުވީ އިންތިހާބު ބޯމަތިވެފައިވަނިކޮށް އިންތިހާބުގެ އުސޫލަށް ކުއްލި ބަދަލު ގެނައުމަކީ އެމްޑީޕީއިން ގަބޫލު ކުރާނެ ކަމެއް ނޫން ކަމަށެވެ.
"އަޅުގަނޑުމެންގެ ކަންބޮޑުވުމަކީ އިންތިހާބެއް ބޯމަތިވެފައިވަނިކޮށް އިންތިހާބެއް ކައިރިވެފައިވަނިކޮށް އިންތިހާބެއްގެ މެދު ތެރެއިން ކަންކަމަށް އެއްގޮތް މިގޮތް ހަދަން އުޅުން، ވާނުވާއެއް ނޭނގެ،" އިންތި ވިދާޅުވި އެވެ.
އެމްޑީޕީއިން ގައުމީ ފެންވަރުގައި ބޮޑު ޕްރައިމަރީއެއް ބާއްވައި ނިންމައި، ކެންޑިޑޭޓުން ހޮވައި ކެމްޕެއިންއަށް ފައްކާވުމުން ކުއްލިއަކަށް ސުޕްރީމް ކޯޓުން ގާނޫނުގެ މާއްދާ އުވާލި އުވާލުމަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވި އެވެ.
"ޕްރައިމަރީއިން ބަލި މީހުން ވާދަ ކުރެވޭނެ ގޮތް ހެދީ އަޅުގަނޑުމެން ގަޑުބަޑުކުރަން، އެ ނިޔަތުގަ ކުރި ކަމެއް، މި ހުރިހާ ދުވަހު ހަމަ އެ ގާނޫނު އެއްގޮތަށް ބާއްވައިގެން ރައީސް ޔާމީނަށް ވާގިވެރިވުމަށް އޮންނަވާފަ މިއަދު ހަމަ އަޅުގަނޑުމެން ވާދަވެރި އިންތިހާބެއް ބާއްވާ ނިންމާލީމަ އަޅުގަނޑުމެން ޕާޓީއަށް އަމާޒުކޮށް، ގެއްލުން ދިނުމަށް އެހެން ޕާޓީތަކަށް ވާގިވެރިވުމަށް ހިންގި ޖަރީމާއެއް، ހިމޭން ބަޣާވާތެއް އެކުރީ،" އިންތި ވިދާޅުވި އެވެ.
އެކަންކަމަށް ހޭލުންތެރިވާންވީ ރައްޔިތުން ކަމަށް އިންތި ވިދާޅުވި އެވެ. އިންތި ވިދާޅުވީ ރައްޔިތުންނަށް ބޭނުންވާ ކަންކަން ފުއްދައިދިނުމަށް ވައުދުތަކެއް ހިފައިގެން ނުކުތީ ހަމައެކަނި އެމްޑީޕީއިން ކަމަށެވެ. އެހެން ޕާޓީތަކުން މަސައްކަތް ކުރަނީ އިންތިހާބުގެ އުސޫލުތައް ބަދަލުކުރުމަށާއި އިންތިހާބު ފަސްކުރުމަށް ކަމަށް އޭނާ ވިދާޅުވި އެވެ.
އިންތި މިހެން ވިދާޅުވިއިރު އެމްޑީޕީގެ ރައީސް މުހައްމަދު ނަޝީދު ވެސް ވަނީ އެ ހުކުމަށް ފާޑުވިދާޅުވެފަ އެވެ. އެކަމާ ގުޅިގެން ރައީސް ނަޝީދު ކުރެއްވި ޓްވީޓެއްގައި ވިދާޅުވީ ރާއްޖޭގެ ކޯޓުތަކުގެ އަގު ވެއްޓި އިތުބާރު ގެއްލިގެންދާ އެންމެ ބޮޑު ސަބަބަކީ ކޯޓުތަކުން އިންތިހާބުތަކަށް ނުފޫޒު ފޯރުވުން ކަމަށެވެ. މަޖިލިސް އިންތިހާބަށް ކުރިމަތިލުމުގެ މުއްދަތު އިތުރު ކުރުމަކީ ސުޕްރީމް ކޯޓަށް ކުރެވޭނެ ކަމެއް ނޫން ކަމަށް އެމަނިކުފާނު ވިދާޅުވި އެވެ.