ކެނަޑާގެ ޖޮގްލިން އެތުލެޓީ މައިކަލް ކަޕްރަލް ހަދާ ޖޮގްލިންގެ ދުނިޔޭގެ ދެ ރެކޯޑް ރާއްޖޭގައި ހަދަން ނިންމައިފި އެވެ.
މިއީ ރާއްޖޭގައި ފާހަގަ ކުރަމުންދާ ޓުއަރިޒަމް ދުވަހާ ގުޅިގެން، އެމްއެމްޕީއާރްސީ އާއި ޔޫތު ސްޕޯޓްސް މިނިސްޓްރީ އާއި ޓޯޓަލް ފިޓްނަސް ގުރޫޕް (ޓީއެފްޖީ) އާ ގުޅިގެން ހަދާ ދުނިޔޭގެ ދެ ރެކޯޑެކެވެ.
ޖޮގްލް ކުރުމަކީ، ބޯޅަ އުކަމުން ބޯޅަތައް ހިފަމުން ވަކި ކީލޯމީޓަރަށް ދުވުމެވެ. ޖްގްލް ކުރާ ކަޕްރަލްގެ ޓާގެޓަކަށް ވާނީ ބޯޅަތައް ވެއްޓުނަ ނުދީ ކުރިއަށް ގެންދިއުމެވެ. އެންމެ ބޯޅައެއް ވެސް ވެއްޓިއްޖެނަމަ އެބޯޅައެއް ވެއްޓުނު ހިސާބަށް އައިސް އަލުން ފަށަންޖެހޭނެ އެވެ. ޖޮގްލު ކުރަމުން މެރެތަން އާއި ހާފު މެރެތޮންގެ ފުރިހަމަ ކުރި ދުނިޔޭގެ ރެކޯޑް މިހާރުވެސް އޮންނަނީ މައިކަލް ކަޕްރަލް އަތުގަ އެވެ.
ޖޮގްލިންގެ ފުރަތަމަ ރެކޯޑް އޮންނާނީ، އަންނަ ހުކުރު ދުވަހު އައްޑޫގައި ޓީއެފްޖީން ބާއްވާ އައްޑޫ ލޯންގް ރަން އިވެންޓްގަ އެވެ. ޓީއެފްޖީ "ރަން އިން އައްޑޫ" ގެ ބައިވެރި އައްޑޫގައި ދުވާއިރު ކަޕްރަލް ދުވާނީ ޖޮގްލް ކުރަމުންނެވެ. ޖޮގްލް ކުރަމުން އޭނާ 10 ކިލޯމީޓަރަށް ދުވުމަށް ވަނީ ހަމަޖެހިފަ އެވެ.
މިއަދު އެމްއެމްޕީއާރްސީގައި ބޭއްވި ޕްރެސްގައި ވާހަކަ ދައްކަމުން ކަޕްރަލް ބުނީ، ހަތަރު ބޯޅަ ހިފައިގެން ޖޮގްލް ކުރަމުން 10 ކިލޯ މީޓަރު ދުވުމަކީ ދުނިޔޭގައި މުޅިން އަލަށް ހަދާ ރެކޯޑެއް ކަމަށެވެ. ކުރިން ހެދި ރެކޯޑް ހަދާފައި ވަނީ ތިން ބޯޅަ ބޭނުން ކޮށްގެންކަން އޭނާ ފާހަގަ ކުރި އެވެ.
އޭނާ ހަދާ ދެ ވަނަ ރެކޯޑަކީ ތިން ބޯޅަ ޖޮގްލް ކުރަމުން ސިޑިއަށް އެރުމެވެ. އެއީ ކޮންމެ ފަހަރަކު ސިޑީގެ ހަރުފަތަކަށް އަރަމުން 3000 ފަހަރަށް ހަރުފަތަށް އެރުމެވެ. މީގެ ކުރިން އޭނާ ހެދި ރެކޯޑްގައި އަރާފައި ވަނީ 600 ހަރުފަތަށެވެ. އޭނާގެ ޓާގެޓަކަށް ވާނީ އެއްޣަޑިއރު ތެރޭ 3000 ފަހަރު ހަރުފަތަށް އެރުމެވެ. މި ރެކޯޑް ހެދުން އޮންނާނީ އަންނަ ހޮނިހިރު ދުވަހު ސަލްޓަން ޕާކުގަ އެވެ.