ރާއްޖޭގައި މިހާރު ފެތުރެމުންދާ ހިމަބިއްސަށް ދެ މީހަކު ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖަންސީ (އެޗްޕީއޭ) އިން ބުނެފި އެވެ.
އެޗްޕީއޭއިން މިއަދު ކުރި ޓުވީޓެއްގައި ބުނީ އިއްޔެ ޓެސްޓު ކުރި ނުވަ މީހުންގެ ތެރެއިން އެއްވެސް މީހަކަށް ހިމަބިހި ޖެހިފައި ނުވާ ކަމަށާއި ނަމަވެސް މިއަދު ޓެސްޓު ކުރި ނުވަ މީހުންގެ ތެރެއިން ދެ މީހަކު އެ ބައްޔަށް ޕޮޒިޓިވްވެފައިވާ ކަމަށެވެ. އެއީ ކޮން އުމުރުފުރައެއްގެ ބައެއް ކަމެއް އެޗްޕީއޭއިން ނުބުނެ އެވެ.
މި ދެ ކޭސްއާއެކު ހިމަބިހި ޖެހިފައިވާ މީހުންގެ އަދަދު ހައަކަށް ވަނީ އިތުރުވެފަ އެވެ.
ރާއްޖެއިން ހިމަބިހި ނުފެންނަތާ ނުވަ އަހަރު ފަހުން އެ ބަލި ނައްތާލާފައިވާ ކަމުގެ އެވޯޑު ދީފައި ވަނިކޮށް އަލުން އެ ބަލި މީހަކަށް ޖެހި ފެތުރެން ފަށާފައިވާ ކަން އިއުލާން ކުރީ މިދިޔަ ހަފްތާގެ ހޯމަ ދުވަހުގަ އެވެ. އޭގެ ފަހުން ގިނަ ބަޔަކަށް އަންނަނީ ވެކްސިން ދެމުންނެވެ.
