އެންމެ ކުޑަ އުޖޫރަ ނުވަތަ މިނިމަމް ވޭޖް ކަނޑައެޅުމާ ގުޅޭ ގޮތުން އާންމުންގެ ހިޔާލު ހޯދުމަށް ރައްޔިތުންގެ މަޖިލީހުގައި އަންނަ ބުދަ ދުވަހު އާންމު ބައްދަލުވުމެއް ބޭއްވުމަށް ނިންމައިފި އެވެ.
މަޖިލީހުގެ އިދާރާ އިން ބުނީ މި ބައްދަލުވުން އޮންނާނީ އަންނަ ބުދަ ދުވަހުގެ ރޭ 8:15 އިން 10:30 އަށް މަޖިލީހުގެ އާ އިމާރާތުގެ ހަތަރުވަނަ ފަންގިފިލާގައި ކަމަށެވެ. އެ ބައްދަލުވުމުގައި މަޖިލީހުގެ މެންބަރުންނާއި ކަމާ ބެހޭ މުއައްސަސާތަކުގެ ފަންނީ ބޭފުޅުން ބައިވެރިވެވަޑައިގަންނަވާނެ އެވެ.
ރައްޔިތުންގެ މަޖިލީހަށް ހުށަހަޅާ ބިލުތަކާއި މައްސަލަތަކާ ގުޅޭ ގޮތުން އާންމުން ހިޔާލު ހޯދުމަށް ކުރިއަށް އޮތް ތަނުގައި މަޖިލީހުގައި އާންމު ބައްދަލުވުންތަކެއް ބޭއްވުމަށް ވަނީ ހަމަޖައްސާފަ އެވެ. އަންނަ ބުދަ ދުވަހުގެ ރޭ ބާއްވާ ބައްދަލުވުމަކީ އެ ގޮތަށް ބާއްވާނެ ފުރަތަމަ ބައްދަލުވުމެވެ. އަދި މިއީ މަޖިލީހުގައި ފުރަތަމަ ފަހަރަށް ކުރާ ކަމެކެވެ.
މަޖިލީހުގެ މިއަދުގެ ޖަލްސާގައި މަޖިލީހުގެ ރައީސް މުހައްމަދު ނަޝީދު ވިދާޅުވި ގޮތުގައި އެ އާންމު ބައްދަލުވުންތައް ބާއްވާނީ ރޭގަނޑުގެ ވަގުތެއްގަ އެވެ. އެ ބައްދަލުވުންތަކުގައި ބިލު ހުށަހަޅުއްވާ މެންބަރާއި، ސަރުކާރުގެ ފަރާތުން ހުށަހަޅާ ބިމެއް ނަމަ ސަރުކާރު ހިންގާ ޕާޓީގެ ޕާލިމެންޓްރީ ގްރޫޕްގެ ލީޑަރާއި، ސަރުކާރު ފަރާތުން މައުލޫމާތު ދޭނެ ބޭފުޅުން އެ ބައްދަލުވުންތަކުގައި ބައިވެރިވެވަޑައިގަންނަވާނެ ކަމަށް ނަޝީދު ވިދާޅުވި އެވެ.
އެ ގޮތަށް ބާއްވާ ފުރަތަމަ ބައްދަލުވުމުގައި މިނިމަމް ވޭޖް ކަނޑައެޅުމާ ގުޅޭ ގޮތުން އާންމުންގެ ހިޔާލު ހޯދާއިރު، އެ ކަމަށް އިކޮނޮމިކް މިނިސްޓްރީގެ ބޯޑުން ދިރާސާކޮށް އެކުލަވާލާފައިވާ ރިޕޯޓް މަޖިލީހުގެ އިގްތިސާދީ ކޮމިޓީން ދަނީ ދިރާާސާ ކުރަމުންނެވެ. އެ ކޮމިޓީން ނިންމާފައި ވަނީ މި މަހުގެ 11 ގެ ކުރިން އެ ކަމުގައި ގޮތެއް ނިންމުމަށެވެ.
މިހާރު އާންމުންގެ ހިޔާލު ހޯދަނީ މަޖިލީހުން އެ ކަމަށް އިއުލާން ކުރުމުން ވަކި މުއްދަތެއްގެ ތެރޭގައި މަޖިލީހަށް ހިޔާލު ފޮނުވަން ޖެހޭ ގޮތަށެވެ. އެ ގޮތަށް ހިޔާލު ފޮނުވަން ޖެހެނީ ލިޔުމަކުންނެވެ. މަޖިލީހުގެ އިދާރާއިގެ އިތުރަށް އިމެއިލް މެދުވެރިކޮށް ހިޔާލު ފޮނުވެ އެވެ. ހިޔާލަށް ހުށަހަޅަން ހުޅުވާލަނީ ބިލެއް ކޮމިޓީއަށް ދިރާސާ ކުރަން ފޮނުވުމަށް ފަހުގަ އެވެ.