މިހާރު ދުނިޔެއަށް ކުރިމަތިވެފައިވާ ކޮރޯނާ ވައިރަހުގެ ސަބަބުން، މިހާރު އޮތް ހާލަތު އިތުރަށް ގޯސްވެ، އެކަމުގެ ނޭދެވޭ އަސަރު ދިގު ދެމިގެން ހިނގައްޖެނަމަ، ސަރުކާރުން ކަނޑައަޅާފައިވާ ޕީއެސްއައިޕީ މަޝްރޫއުތައް ވެސް މަޑުޖައްސާލަންޖެހިދާނެ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ.
ރޭ ރައްޔިތުންގެ މަޖިލީހުން މިނިމަމް ވޭޖާ ގުޅޭ ގޮތުން އާންމުންގެ ހިޔާލު ހޯދަން ބޭއްވި ފޯރަމްގައި، ކޮރޯނާ ވައިރަހާ ގުޅިގެން މަޑުޖެހިފައި އޮތީ މިނިމަމްވޭޖް ކަނޑައެޅުން ކަމަށާއި ސަރުކާރުގެ މަޝްރޫއުތަކަށް އެކަމުން އަސަރުކުރާތަން ނުފެންނަ ކަމަށް އާންމުންގެ މީހަކު ފާޅުކުރި ކަންބޮޑުވުމަކަށް ޖަވާބު ދެއްވަމުން ފައްޔާޒު ވިދާޅުވީ، ކޮރޯނާ ވައިރަހުގެ ދަތިކަން އިގުތިސޯދަށް ކުރިމަތިވެފައިވާ ކަމަށެވެ.
އަދި ރާއްޖެއަށް މިހާރު ކުރިމަތިވެފައިވާ ހާލަތު ކުރިއަށްއޮތް ހަ މަހެއްހާ ދުވަހަށް ދިގު ދެމިގެން ގޮސްފި ނަމަ، ރާއްޖޭގެ އިގުތިސޯދަށް ވަރަށް ބޮޑު އަސަރެއް ކުރާނެ ކަމަށް ވެސް މިނިސްޓަރު ވިދާޅުވި އެވެ.
"ޕީއެސްއައިޕީ ޕްރޮޖެކްޓުތަކަށް ވެސް އަދި ވާނެ ގޮތެއް ނޭނގެ. ސަރުކާރުގެ ރެވެނިއުގެ ބޮޑު ބައެއް މި ޑިޕެންޑުވަނީ ޓޫރިޒަމް އެރައިވަލްއާއި ޓީޖީއެސްޓީ ޓެކްސްއަށް. އެންމެން ދުއާ ކުރަންވީ އިނގޭތޯ މީގެ ބޮޑު އިމްޕެކްޓެއް ނާންނާނެ ކަމަށް،" އޭނާ ވިދާޅުވި އެވެ.
ފައްޔާޒު އިތުރަށް ވިދާޅުވި ގޮތުގައި އެފަދަ ހާލަތެއް މެދުވެރިވެއްޖެނަމަ، ޕީއެސްއައިޕީ ޕްރޮޖެކްޓުތައް ވެސް މަޑުޖައްސާލަން ޖެހޭނެ ކަމަށެވެ. ނަމަވެސް، އެއާ ވިދިގެން މިނިސްޓަރު ވިދާޅުވީ އެވާހަކައަކީ އޭނާ އަމިއްލަފުޅު ހައިސިއްޔަތުން ދެކެވަޑައިގަންނަވާގޮތް ކަމަށާއި، އެއީ އަދި ސަރުކާރުގެ ފަރާތުން ބުނާ އެއްޗެއް ނޫން ކަމަށެވެ.
ވަރަށް ފޯރީގައި ރޭ ކުރިއަށްދިޔަ ފޯރަމްގައި އާންމުންނާއި ވިޔަފާރިވެރިންގެ ގިނަ ހިޔާލުތަކާއި ކަންބޮޑުވުންތައް ފާޅުކުރި އެވެ.
އެގޮތުން، ހާއްސަކޮށް ކުދި އަދި މެދުފަންތީގެ ވިޔަފާރިވެރިންގެ ފަރާތުން ވާހަކަ ދެއްކި ގިނަ މީހުން ބުނީ، މިހާރު ހުށަހަޅާފައިވާ 6،400 ރުފިޔާގެ އުޖޫރަ ކަނޑައަޅައިފިނަމަ، އެމީހުންގެ ވިޔަފާރިތައް ހުއްޓާލަން ޖެހޭ ހިސާބަށް ދާނެ ކަމަށެވެ.
އޭގެ އިތުރުން، އެކި ދާއިރާތަކަށް ވަކި މިނިމަމް ވޭޖެއް ކަނޑައަޅަންޖެހޭ ކަމަށް އެއް ބަޔަކު ބުނަމުންދިޔަ އިރު، އަނެއް ބަޔެއްގެ ހިޔާލުހުރީ ރާއްޖޭގައި މަސައްކަތްކުރާ ބިދޭސީންނަށް އެންމެ ކުޑަ އުޖޫރު ކަނޑައަޅަން ނުޖެހޭ ގޮތަށެވެ.
އެ ފޯރަމްގައި ބައިވެރިވި މަސައްކަތްކުރާ ފަރާތްތަކުން ބުނަމުން ދިޔައީ، މިނިމަމް ވޭޖް ކަނޑަނާޅައި ސަރުކާރުން ލަސްކުރަނީ ވިޔަފާރިވެރިންގެ ހައްގުގައި ކަމަށެވެ.
އެފަދަ ކަންބޮޑުވުންތަކަށް ޖަވާބު ދެއްވަމުން ފައްޔާޒު ވިދާޅުވި ގޮތުގައި، މިނިމަމް ވޭޖެއް ކަނޑައެޅުމުން ކުރާނެ ހުރިހާ ފަރާތްތަކަށް ކުރާނެ އަސަރުތަކަށް ސަރުކާރުން ވިސްނަންޖެހޭ ކަމަށެވެ.
އެގޮތުން، ރާއްޖޭގެ މަސައްކަތްކުރާ މީހުންގެ އާބާދީ އެންމެ ބޮޑީ ޕްރައިވެޓް ސެކްޓާގައި ކަމުން، މިނިމަމްވޭޖެއް ކަނޑައަޅައިގެން، ވަޒީފާތަކެއް ގެއްލުމުގެ ފުރުސަތު އޮންނާނެކަމަށްވެސް ފައްޔާޒު ރޭ ވަނީ ފާހަގަކުރައްވައިފަ އެވެ.