ނޭޝަނަލް އިންޓެގްރިޓީ ކޮމިޝަން (އެންއައިސީއަށް) އަށް ހުށަހެޅި މައްސަލައެއް އެ ކޮމިޝަނުން ބަލަމުން ނުދާ ކަމުގެ ޝަކުވާއެއް ނުވަތަ އެ ކޮމިޝަނަށް ހުށަހެޅި މައްސަލައާ ގުޅޭ އެހެން ވެސް ޝަކުވާއެއް އޮތް ނަމަ ރައްޔިތުންގެ މަޖިލީހަށް އެންގުމަށް އެ މަޖިލީހުގެ އިދާރާއިން އިއުލާން ކޮށްފި އެވެ.
އެންއައިސީއަކީ ކަސްޓްމްސް އާއި ފުލުހުންނާއި ކަރެކްޝަންސްގެ އިތުރުން އިމިގްރޭޝަންގެ މުވައްޒަފުން ކުރާ ގާނޫނާއި ގަވާއިދާ ހިލާފު އަމަލުތައް ތަހުގީގު ކުރުމަށާއި އެފަދަ ކަމަކަށް ތުހުމަތުކުރެވި މައްސަލައެއް ހުށަހަޅައިފިނަމަ އެ ކަން ތަހުގީގު ކުރަން އޮންނަ ކޮމިޝަނެކެވެ. ކޮމިޝަން އުފެއްދީ 2015 ވަނަ އަހަރުގަ އެވެ.
ރައްޔިތުންގެ މަޖިލީހުގެ އިދާރާއިން މިއަދު ނެރުނު އިއުލާނެއްގައި ބުނެފައިވަނީ، ފާއިތުވި ދުވަސްތަކުގައި އެންއައިސީއަށް ހުށަހަޅާ ޝަކުވާތަކާއި މައްސަލަތައް ބެލުމުގައި އެ ކޮމިޝަނުން އިހުމާލުވެފައިވާ ކަން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ ނުވަތަ 241 ކޮމިޓީއަށް ފާހަގަ ކުރެވިފައިވާ ކަމަށެވެ.
އެހެންކަމުން އެ މައްސަލަ ބަލައިދިނުމަށް މިނިވަން މުއައްސަސާތަކުގެ ކޮމިޓީއަށް 241 ކޮމިޓީން ވަނީ ފޮނުވައިފަ އެވެ. އެ ކޮމިޓީގެ ތެރެއިން މި ކަމަށް ސަބް ކޮމިޓީއެއް ވެސް ނަގާފައިވެ އެވެ. މަޖިލީހުގެ ގަވާއިދު ބުނާ ގޮތުން އެންއައިސީ ފަދަ މިނިވަން މުއައްސަސާތައް ޖަވާބުދާރީ ކުރުމުގެ މެންޑޭޓް އޮންނަނީ މިނިވަން މުއައްސަސާތަކުގެ ކޮމިޓީއަށެވެ.
މަޖިލީހުގެ އިދާރާއިން ނެރުނު އިއުލާނުގައި ވަނީ، އެންއައިސީއަަށް ހުށަހަޅާފައިވާ މައްސަލައެއް ނުވަތަ މައްސަލައަކާ ގުޅޭ ޝަކުވާއަކާ ގުޅޭ ގޮތުން އެ ސަބް ކޮމިޓީއަށް މައުލޫމާތު ހުށަހަޅަން ބޭނުންވާ ފަރާތެއްވާނަމަ އެ ފުރުސަތު ހުޅުވާލާ ކަމަށެވެ. އެ ފުރުސަތު ހުޅުވާލާފައި ވަނީ މި މަހުގެ 16 ވަނަ ދުވަހުގެ ނިޔަލަށެވެ.
އެ މައުލޫމާތެއް ހުށަހަޅާ ފަރާތުގެ ނަމާއި ގުޅޭނެ ފޯނު ނަންބަރު ބަޔާންކޮށް މަޖިލީހުގެ އިދާރާއަށް ލިޔުމުން ހުށަހެޅުމަށް އިއުލާނުގައި އެދިފައިވެ އެވެ. އީމެއިލް މެދުވެރިކޮށް ފޮނުވާނަމަ، [email protected] ގެ މެއިލަށް ފޮނުވަން އިއުލާނުގައި ބުނެފައިވެ އެވެ.
ކޮވިޑް-19 ގެ ބަލިމަޑުކަމުގެ ހާލަތާ ގުޅޭ ގޮތުން ސަރުކާރަށް މަޖިލީހުން ލަފައެއް ދިނުމަށް ޓަކައި، މިނިވަން މުއައްސަސާތަކުގެ ކޮމިޓީއަށް އެންއައިސީއަށް އެދުނު ބައެއް މައުލޫމާތު ދީފައި ނުވާ ކަމަށް އެ ކޮމިޓީގެ މުގައްރިރު އަދި އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވެސް ވިދާޅުވެފައިވެ އެވެ.
މިނިވަން މުއައްސަސާތަކުގެ ކޮމިޓީގެ އެ ރިޕޯޓަށް މަޖިލީހުގެ ތަޅުމުގައި ބަހުސް ކުރެއްވި ދުވަހު އެމްޑީޕީގެ ގިނަ މެންބަރުންތަކެއް ވަނީ އެންއައިސީގެ މެންބަރުންގެ އިސްތިއުފާއަށް ވެސް ގޮވާލައްވައިފަ އެވެ. އަދި އެންއައިސީގެ މެންބަރުން ވަކި ކުރުމުގެ މަސައްކަތް މަޖިލީހުން ފެށުމަށް ގޮވާލާފައިވެ އެވެ.
އެންއައިސީއަށް މި މަޖިލީހުން ރުހުންދީގެން އައްޔަން ކުރީ ކޮމިޝަންގެ މެންބަރު އަހުމަދު ޖިހާދެވެ. ދެން ކޮމިޝަންގައި ތިއްބަވަނީ އެ ކޮމިޝަންގެ ރައީސް އަހުމަދު ސުލައިމާން އާއި، ކޮމިޝަންގެ ނައިބު ރައީސް ހައްސާން ހަމީދު އާއި، މެންބަރު ހަދީޖާ އަބްދުﷲގެ އިތުރުން، މެންބަރު އަހުމަދު އަމީނެވެ. އެއީ ކުރީގެ މަޖިލީހުން ރުހުން ދިން މެންބަރުންނެވެ.