ކޮވިޑް-19 އާ ގުޅިގެން އިއުލާންކޮށްފައިވާ ކުއްލި ނުރައްކަލުގެ ހާލަތު މިހާރުން މިހާރަށް އުވާލަން މަޖިލީހުގެ މައްޗަންގޮޅި އުތުރު ދާއިރާގެ އެމްޑީޕީ މެމްބަރު މުހައްމަދު ރަޝީދު (ބޯދިގު) ގޮވާލައްވައިފި އެވެ.
ކޮވިޑާ ގުޅިގެން އަޅާފައިވާ ފިޔަވަޅުތަކުގެ ސަބަބުން ހޮޓާ ރެސްޓޯރެންޓްތަކަށް ގެއްލުންވަމުން ދާތީ އެކަން ހައްލު ކުރަން ހުށަހެޅި މައްސަލައިގެ ބަހުސްގައި ރަޝީދު ވިދާޅުވީ ކޮވިޑާ ގުޅިގެން ކުއްލި ހާލަތު އިއުލާންކޮށްފައި އޮންނަތާ އަހަރެއްވާން ދާއިރު އޭގެ ސަބަބުން އަނބިދަރިންނާއި މައިންބަފައިންގެ ކައިރިއަށް ދާން ގިނަ ބަޔަކަށް ހުރަސް އެޅިފައިވާ ކަމަށެވެ.
އަދި ސައި ހޮޓާ ފަދަ ކުދި ވިޔަފާރިތައް ބަނގުރޫޓްވެ އެތަންތަން ނުއަގުގައި ވިއްކާލާފައިވާ ކަމަށް ވިދާޅުވިއެވެ.
" އަޅުގަނޑު ދެކޭގޮތުގައި ދުނިޔޭގެ އެހެނިހެން ގައުމުތަކުގައި ކުއްލި ހާލަތު ނެރުމަށްފަހު ގައުމު ބަންދުކޮށްގެން ގެންގުޅޭނީ ސިއްހީ ހާލަތު މިއަށްވުރެ ހަރުދަނާ ކުރުމަށްޓަކައި. އަޅުގަނޑުމެންނަށް ފާހަގަވެގެން ދިޔައީ ކުއްލި ހާލަތު އިއުލާންކުރިތާ އަހަރެއްވެގެން ދިޔައިރުވެސް ސިއްހީ ނިޒާމް އޮތީ އެއް ހިސާބެއްގައި. ކުރިއަށް ނާރާ. ނޭވާ ހޮޅިންވެސް ވައްކަން، ޕުއްޕާމެއިންވެސް ވައްކަން. ހަމަ ވަގަށް ނެގީ. މިހިސާބާށް ކަންތައް ދިޔައިމާ ރައްޔިތުން މާޔޫސްވެއްޖެ،" ރަޝީދު ވިދާޅުވި އެވެ.
ކޮވިޑް ކޮންޓްރޯލް ކުރުމަށް އެޗްޕީއޭއިން ދޭތެރެ ދޭތެރެއިން އަޅަމުންދާ ފިޔަވަޅުތަކަށް ރަޝީދު މިއަދު ވަރަށް ބޮޑަށް ފާޑުވިދާޅުވި އެވެ. އޭގެ ތެރެއިންވެސް ހާއްސަ ކޮށް ކެފޭ ހޮޓާތައް ވަކި ވަގުތެއްގައި ބަންދުކުރަން ޖެހޭ އުސޫލު ފާހަގަކުރެއްވި އެވެ. ކެފޭތަކުގެ ބަދަލުގައި އޭނާ އެދިވަޑައިގެންނެވީ ޖިމް ފަދަ ތަންތަން ބަންދުކުރުމަށެވެ.
"އެއީ އެތަންތާނގަ [ޖިމް] ހުންނަ ސާމަނުތައް ބޭނުންކުރާނީ ހަމަ އެކަތީގަ ހިފާފަ އަނެކަތީގަ ހިފާފަ އެކަކު އަނެކަކު ބޭނުންކުރަމުން ދާނީ، މުޅި މީހާ ދާހިއްލާ ފޯވެފައި ހުންނާނީ،" ރަޝީދު ވިދާޅުވި އެވެ.
ކުއްލި ހާލަތު ދިގު ދެންމުމުގައި އެޗްޕީއޭއަށް ލަފާދޭ ޓެކްނިކަލް އެޑްވައިޒަރީ ގްރޫޕްގެ ނުފޫޒު އޮތުމާއި އެމީހުންނަށް މާލީ ފައިދާ ހޯދަން މަސައްކަތް ކުރާކަމަށްވެސް އޭނާ ތުހުމަތުކުރެއްވިއެވެ. އެހުރިހާ ކަމެއް މަޖިލީހުގެ ކޮމެޓީން ބެލުމަށްފަހު ކުއްލި ހާލަތު މަޖިލީހުން އުވާލަން ޖެހޭ ކަމަށް ވިދާޅުވިއެވެ.