ހިންދީ ފިލްމުތައް ފުރިހަމަ ވަނީ ނުބައިބައި ކުޅޭ މޮޅު މީހެއް ވެސް ހުރެގެންނެވެ. އެގޮތުން މޮގެމްބޯ އާއި ގައްބަރް ސިންގް ފަދަ ނުބައިބައި ކެރެކްޓާތައް އެތައް އަހަރަކަށް މީހުންގެ ހަނދާނުގައި ހަރުލާފައި ހުރެ އެވެ.
"ހަމް އާޕް ކޭ ހޭ ކޯން" އަކީ 80ގެ އަހަރުތަކުގައި ވަރަށް މަޝްހޫރުވި ފިލްމެކެވެ. މިފިލްމުގައި ނުބައިބައި ރޯލު ކުޅުނީ މޮހިނީޝް ބެލް އާއި ރޭނުކާ ޝަހާނޭގެ ގޭގައި ހުރި ދިގު ސިޑިއެކެވެ. ފިލްމުގައި މަޖާ އުފާވެރި ކަންތައްތައް ވަމުން އައިސް ހިތާމަވެރި ފިލްމަކަށް އެފިލްމު ބަދަލުވަނީ ރޭނުކާ "ލޯ ޗަލީ މޭ" ލަވަ ކިޔާ ނިމޭ ތަނުން ސިޑިން ވެއްޓުނު ހިސާބުން ކަމަށް ވީތީ އެވެ.
ކުއްލިއަކަށް ފިލްމަށް އައި ޓުވިސްޓަކީ މިހާތަނަށް ހިންދީ ފިލްމަކުން ފެނުނު އެންމެ ބާރުގަދަ ޓުވިސްޓް ކަމަށް އަދިވެސް ގަބޫލުކުރާ މީހުން ގިނަ އެވެ. ސަބަބަކީ އެންމެންގެ ލޯބި ހޯދާފައިވާ ޕޫޖާ ބާބީ މަރުވެ ފިލްމު މުޅިން ހިތާމަވެރި ފިލްމަކަށް ބަދަލުވަނީ އެހިސާބުން ކަމަށް ވާތީ އެވެ.
"ހަމް އާޕް ކޭ ހޭ ކޯން" ރިލީޒްކުރިތާ ބަރާބަރު 27 އަހަރު ފުރުމާ ދިމާކޮށް އަނެއްކާވެސް "ލޯ ޗަލީ"ގެ މަތިން މީހުން ހަނދާން ކުރަން ފަށައިފި އެވެ. އަދި ސޯޝަލް މީޑިއާގެ އެކި ޕްލެޓްފޯމްތަކުގައި މި ލަވައިގެ މީމްތައް ޓްރެންޑް ވާން ވެސް ފަށައިފި އެވެ.
މިކަމާ ގުޅިގެން ރޭނުކާ ދީފައިވާ އިންޓަވިއުއެއްގައި ބުނެފައިވަނީ ޚުދް އޭނާއަށް ވެސް އެ މީމްސް ވަރަށް މަޖާ ކަމަށެވެ. މި ލަވައިގެ ބެކްސްޓޯރީ ވެސް ރޭނުކާގެ އިންޓަވިއުގައި ކިޔައިދިނެވެ. އޭނާ ބުނި ގޮތުގައި ހަގީގަތުގައި އެ ސިޑި ހަދާފައި ހުރި ގޮތް މީހުންނަކަށް ނޭނގެ އެވެ.
"އެ ސިޑި ތައްޔާރުކޮށްފައިވަނީ އިސްޕަންޖުން. އަހަރެން ވެއްޓޭ މަންޒަރު ކުޅުނުއިރު އަނިޔާއެއް ނުލިބި މަންޒަރު ފުރިހަމަ ކުރެވުނީ އެހެންވެ. ޑައިރެކްޓަރު ސޫރަޖް ބަރްޖަތިޔާ ބޭނުންވީ އެގޮތަށް ސިޑި ހަދަން. އެއްވެސް މީހަކަށް ކުޑަ ނަމަވެސް އަނިޔާއެއް ނުލިބޭތޯ އޭނާ އަބަދުވެސް ޔަގީންކުރާނެ. ހަގީގަތުގައި ސިޑި އިސްޕަންޖުން ހަދާފަ ހުރީމަ އަހަންނަށް އެކްޓްކުރަން މާ އުނދަގޫވި. އެއީ ވަރަށް ބޮޑަށް ތަދުވެ އަނިޔާވިކަން ދައްކަން އެކްޓްކުރަން ޖެހޭލެއް އިތުރުވީމަ،" ރޭނުކާ ބުންޏެވެ.