އަފްޣާނިސްތާންގައި ތާލިބާނުން ދެން އެކުލަވާލާ ވެރިކަމެއްގައި އަންހެނުންނަށް ބައިވެރިވެވޭނެ ކަމަށާއި ތައުލީމް ހާސިލްކުރުމަށާއި ވަޒީފާ އަދާކުރުމަށް ކަނބަލުންނަށް ފުރުސަތު ދޭނެ ކަމަށް އެ ޖަމާއަތުން ބުނެފި އެވެ.
ތާލިބާނުން ބުނީ ކަނބަލުންނަކީ ޖަމާތުގައި މުހިންމު ބައެއް ކަމަށާއި ދީނުގެ އޮނިގަނޑުން ބޭރު ނުވާ ކޮންމެ ކަމެއްގައި ކަނބަލުންނަށް ލުއިދޭނެ ކަމަށެވެ.
ގަތަރުގައި ހުންނަވައި މުއްލާ އަބްދުލް ޣަނީ ބަރާދަރު ކަންދަހާރަށް ވަޑައިގެން ވަނީ ނޫސްވެރިނާ ބައްދަލުކުރައްވާފަ އެވެ. ތާލިބާނުންގެ ތަރުޖަމާން ޒަބީހުﷲ މުޖާހިދު ވިދާޅުވީ ތާލިބާނުންގެ ވެރިކަމެއްގައި ދެކޮޅުވެރިކަމެއް ބަދަލުހިފުމެއް ނޯންނާނެ ކަމަށެެވެ. މުއްލާ އަބްދުލް ޣަނީ ބަރާދަރުއާ މެދު ބުނެވެނީ އަފްޣާންގައި އެކުލަވާލާ ރައީސަކަށް ވާނީ އޭނާ ކަމަށެވެ.
"އަހަރެމެންނަކީ އެއްވެސް ބަޔަކަށް ދުޝަމަނުން ކަމުގައި ނުވާނަން،" މުޖާހިދު ވިދާޅުވި އެވެ.
"އެހެން ބަޔަކު ވެސް އަހަރެމެންނަކީ ދުޝަމަނުން ކަމަށް ދެކިގެން ނުވާނެ،" އޭނާ ވިދާޅުވި ގޮތުން މުޖުތަމައުގައި ކަނބަލުން ހަރަކާތްތެރިވާންވީ އެވެ. އެހެނެއް ކަމަކު އިސްލާމްދީންގައި މަނާކަމެއް ކަނބަލުންނަށް ވެސް މަނާވާނެ އެވެ.
މުޖާހިދު ވިދާޅުވީ ކުރީ ސަރުކާރަށް ޚިދުމަތްކުރި އެއްވެސް މީހަކަށް ގެއްލުމެއް ނުދެއްވާނެ ކަމަށެވެ. އަދި ސިފައިންގެ ކިބައިން ބަދަލުހިފުމެއް ނޯންނާނެ ކަމަށެވެ. އޭނާ އަދި ވިދާޅުވީ ގައުމު ދޫކޮށް އެކަކު ވެސް ދާނެ ކަމެއް ނެތް ކަމަށާއި ކަމެއް ކުރަން އެނގޭ މީހަކު ނަމަ ސަރުކާރުގައި ބައިވެރިވެގެން ގައުމަށް ޚިދުމަތްކޮށްދޭންވީ ކަމަށެވެ.
ތަރުޖަމާން ވިދާޅުވި ގޮތުން އަފްޣާންގައި މީޑިއާއަށް ހުރަހެއް ނެތެވެ. އަފްޣާންގެ ސަގާފަތާއި އާދަކާދަ އަދި އިސްލާމީ ހުދޫދުގެ ތެރެއިން ޚިޔާޅުފާޅުކޮށް ކޮންޓެންޓްތައް ފުޅާކުރަންވީ އެވެ.
ތާލިބާނުންނާ މެދު ހުޅަނގުން ބުނަމުން ގެންދަނީ ހައްގުތައް ދަމަހައްޓަައި ކަމޭހިތާ ނަމަ އެ ޖަމާއަތުން އެކުލަވާލާ ސަރުކާރެއް ގަބޫލުކުރާނެ ކަމަށެވެ. އަދި ބުނީ ތާލިބާނުން ދައްކާ ވާހަކާ ގަބޫލުކުރާނީ އަމަލުކުރަން ފެށުމުން ކަމަށެވެ.