ފެނަކަ ކޯޕަރޭޝަންގެ އިސް ދެ ވެރިޔެއްގެ މައްޗަށް ދައުވާކުރުމަށް އެންޓި ކޮރަޕްޝަން ކޮމިޝަން (އޭސީސީ) އިން ޕީޖީ އޮފީހަށް ފޮނުވައިފި އެވެ.
ދައުވާކުރަން ފޮނުވީ ފެނަކައިގެ އައިސީޓީ ޑިޕާޓްމަންޓާ ކުރިން ހަވާލުވެވަޑައިގެން ހުންނެވި އިސްމާއީލް ޝަމްއޫންގެ މައްޗަށާއި ސޭލްސް އެންޑް ބިލިން ޑިޕާޓްމަންޓްގެ ވެރިޔަކަށް ހުންނެވި އަހްމަދު ނަޖާހުގެ މައްޗަށެވެ.
ޝަމްއޫނާއި ނަޖާހުގެ މައްޗަށް ދައުވާކުރަން ފޮނުވީ ގާނޫނުލް އުގޫބާތުގެ 513 ވަނަ މާއްދާގެ (ށ) އަދި ކޮރަޕްޝަން ހުއްޓުވުމާ މަނާކުރުމުގެ ގާނޫނުގެ 12 ވަނަ މާއްދާގެ (ހ) ގައި ބަޔާންކޮށްފައިވާ ފަދަ ކޮރަޕްޝަންގެ އަމަލެއް ހިންގާފައިވާ ކަމުގެ ތުހުމަތުގަ އެވެ.
މި ދެ ބޭފުޅުންގެ މައްޗަށް ދައުވާކުރަން ފޮނުވީ ފެނަކަ ކޯޕަރޭޝަންގެ ކަސްޓަމަރުންނަށް ބިލްކުރުމަށްޓަކައި 2017 ވަނަ އަހަރުގެ ތެރޭގައި ބިލިން ސޮފްޓްވެއާއެއް ހެދުމަށް ޝުވެކް މޯލްޑިވްސް ޕްރައިވެޓް ލިމިޓެޑާ ހަވާލުކުރި ނަމަވެސް، އެ ހިދުމަތް އަދި މިހާތަނަށް ވެސް ފެނަކަ ކޯޕަރޭޝަނަށް ބިފައިނުވާއިރު، ސޮފްޓްވެއާ ނިމުނުކަމަށް ލިޔުން ދޫކޮށް، ފައިސާ ދީފައިވާ ކަމަށް ބުނާ މައްސަލާގަ އެވެ.
ބިލިން ސޮފްޓްވެއާގެ މަސައްކަތް ޝުވެކް މޯލްޑިވްސް ޕްރައިވެޓް ލިމިޓެޑުން 08 ނޮވެމްބަރ 2017 ގައި ނިންމަށް އެއްބަސްވެފައިވެ އެވެ. ސޮފްޓްވެއާ ނިމުނު ކަމަށް ބެލޭނީ އެ ސޮފްޓްވެއާ ޑިޒައިން ކޮށް، އިމްޕްލިމެންޓް ކުރުމުން ކަމަށް އެއްބަސްވުމުގައި ބަޔާންކޮށްފައިވެ އެވެ. އެހެންނަމަވެސް އޮކްޓޯބަރު 15، 2018ގެ ނިޔަލަށް ވެސް އެ ސޮފްޓްވެއާ ނިންމާފައި ނު ވާކަމާއި އަދި ފެނަކަ ކޯޕަރޭޝަން ލިމިޓެޑްގައި އެ ސޮފްޓްވެއާ އިމްޕްލިމެންޓް ކޮށްފައިނުވާކަން ތަހުގީގަށް ހޯދާފައިވާ ލިޔެކިޔުންތަކުން އެނގޭ ކަމަށް އޭސީސީން މައުލޫމާތުދެ އެވެ.
އޭސީސީން ބުނީ ބިލިން ސޮފްޓްވެއާގެ މަސައްކަތް ޝުވެކް މޯލްޑިވްސް ޕްރައިވެޓް ލިމިޓެޑުން ނިންމާފައި ނުވަނީސް އެމަސައްކަތް ނޮވެމްބަރު 6، 2017 ގައި ނިންމާފައިވާ ކަމަށް ބަޔާންކޮށް ޝުވެކުން، ފެނަކަ ކޯޕަރޭޝަނަށް ހުށަހަޅާފައިވާ ސިޓީގައި ޝަމްއޫން އަދި ނަޖާހު ވެސް ސޮއިކޮށްފައިވާ ކަމަށެވެ.
"އޭގެއިތުރުން ބިލިން ސޮފްޓްވެއާ ހޯސްޓްކުރުމުގެ ގާބިލުކަން ފެނަކަ ކޯޕަރޭޝަންގެ އަމިއްލަ ސާވާގައި ހުރިކަން އެނގެ އެވެ. އަދި އެއްބަސްވުމުގެ އެއްވެސް މާއްދާއެއްގައި ޝުވެކް މޯލްޑިވްސް ޕްރައިވެޓް ލިމިޓެޑްގެ ސާވާގައި އެ ސޮފްޓްވެއާ ހޯސްޓްކުރުމާ ގުޅޭ އެއްވެސް ކަމެއް ބަޔާންކޮށްފައި ނުވެ އެވެ. އެހެންނަމަވެސް، އެ ސޮފްޓްވެއާ ހޯސްޓްކުރުމަށް ޝުވެކް މޯލްޑިވްސްއަށް ހުއްދަދީ އެކަމަށް ފައިސާ ދޫކުރުމަށް ފެނަކަ ކޯޕަރޭޝަންގެ އައިސީޓީ ޑިޕާޓްމަންޓުން އެ ކުންފުނީގެ ފައިނޭންސް ޑިޕާޓްމަންޓަށް މެމޯއެއް ފޮނުވާފައިވެ އެވެ،" އޭސީސީގެ ބަޔާނުގައިވެ އެވެ.
އޭސީސީން ބުނީ ޝުވެކް މޯލްޑިވްސް ޕްރައިވެޓް ލިމިޓެޑުން ބިލިން ސޮފްޓްވެއާގެ ފޭސް ދޭއް އަދި ތިނެއްގެ މަސައްކަތާއި، ވޭރިއޭޝަންގެ ގޮތުގައި ގެނައުމަށް ނިންމާފައިވާ މަސައްކަތްތައް ނިމިފައި ނުވަނީސް، އެ މަސައްކަތްތައް ނިންމާފައިވާ ކަމަށް ބަޔާންކޮށް ފައިސާ ދޫކޮށްދިނުމަށް އައިސީޓީ ޑިޕާޓްމަންޓުން އެ ކުންފުނީގެ ޓެންޑާ ސެކްޝަނަށް ފޮނުވާފައިވާ އިންޓާނަލް މެމޯ ގައި ސޮއިކޮށްފައިވަނީ ވެސް ޝަމްއޫން ކަން ތަހުގީގު އެނގޭ ކަމަށެވެ.
ބިލިން ސޮފްޓްވެއާ ހޯސްޓް ކުރުމަށާއި، ޝުވެކް މޯލްޑިވްސް ޕްރައިވެޓް ލިމިޓެޑުން އެ ސޮފްޓްވެއާގެ މަސައްކަތް ނިންމާފައި ނުވި ނަމަވެސް އެމަސައްކަތަށްވާ ފައިސާ ފުރިހަމަ އަށް ދޫކޮށްފައިވަނީ ޝަމްއޫން އަދި ނަޖާހު ސޮއިކޮށްފައިވާ ހުއްދައަށް ރިއާޔަތްކޮށްގެން ކަން ތަހުގީގުން އެނގޭތީ އެއީ ޝުވެކަށް ނާޖާއިޒު މަންފާއެއް ހޯދައިދިނުމަށް ކޮށްފައިވާ ކަމެއްކަން ތަހުގީގަށް އެނގޭ ކަމަށްވެސް އޭސީސީން ވަނީ ބުނެފަ އެވެ.