ރާއްޖޭގެ އިރު އުތުރުން ސްރީލަންކާ ކައިރީގައި ކޮޅިގަނޑެއް އުފެދިފައިވާ ކަމަށް މޫސުމާ ބެހޭ ގައުމީ އިދާރާއިން ބުނެފި އެވެ.
މެޓް އޮފީހުން މިއަދު ބުނީ މި ކޮޅިގަނޑުގެ ސަބަބުން ކުރިއަށް އޮތް ތިން ދުވަހު ރާއްޖޭގެ ބައެއް ސަރަހައްދުތަކަށް މޫސުން ގޯސްވެދާނެ ކަމަށެވެ. އެގޮތުން ކުރިއަށް އޮތް ތިން ދުވަހު ރާއްޖެ ސަރަހައްދުގައި ވަޔާއި ކަނޑު ގަދަވާނެ ކަމަށް ލަފާކުރެވޭ ކަމަށެވެ.
މީގެ އިތުރުން މި ކޮޅިގަނޑުގެ ސަބަބުން ކުރިއަށް އޮތް ތިން ދުވަހަށް ބައެއް ރަށްރަށަށް ބޯކޮށް ވާރޭ ވެހޭނެ ކަމަށް ވެސް މެޓް އޮފީހުން ވަނީ ލަފާކޮށްފަ އެވެ.
މެޓް އޮފީހުން މިހާރު ވަނީ ބައެއް ސަރަހައްދުތަކަށް މޫސުން ގޯސްވެދާނެ ކަމަށް ލަފާކޮށް ވައިޓް އެލާޓްވެސް ނެރެފަ އެވެ. އެގޮތުން ހއ. އަތޮޅުން ފެށިގެން ޅ އަތޮޅަށް އަދި ކ އަތޮޅުން ފެށިގެން އައްޑޫ އަތޮޅަށް ވަނީ ވައިޓް އެލާޓް ނެރެފަ އެވެ.
މޫސުން ގޯސްވާނެ ކަމަށް ލަފާ ކުރެވޭތީ މެޓް އޮފީހުން ވަނ ހުރިހާ ރައްޔިތުންވެސް އެކަމަށް ސަމާލުކަން ދިނުމަށް އިލްތިމާސް ކޮށްފަ އެވެ. އޭގެތެރެއިން ވެސް ކަނޑުދަތުރުކުރާ މީހުން ވަކިން ހާއްސަކޮށް މޫސުމަށް ސަމާލުކަން ދިނުމަށް އެދިފައިވެ އެވެ.
މޫސުން ގޯސްވެ، އެލާޓްތައް ނެރެފައި ވަނިކޮށް ކަނޑުމައްޗަށް މީހުން ނިކުތުމުން، ކަނޑުމަތީގައި ބޮޑެތި ހިތާމަވެރި ހާދިސާތައް މީގެކުރިން ހިނގާފައި އެބަހުއްޓެވެ.