މޯލްޑިވްސް ނެޝަނަލް ޕާޓީ (އެމްއެންޕީ) ގެ ޔޫތު ވިންގްގެ ފަރާތުން "ނޫކަށި ލައުންޖު" ގެ ނަމުގައި ޒުވާނުންނަށް ހާއްސަ ލައުންޖެއް ހުޅުވައިފި އެވެ.
މިރޭ މިލައުންޖް ހުޅުވުމަށް ބޭއްވިި ރަސްމިއްޔާތުގައި ލައުންޖް ހުޅުވައިދެއްވީ ޕާޓީގެ ރައީސް ކާނަލް މުހައްމަދު ނާޒިމެވެ. މިލައުންޖް ހުޅުވާފައިވަނީ މާފަންނު ވެސްޓްޕާކް ސަރަހައްދުން ހަވީރީ ހިނގުމުގައި މ. ގަހަނާ ލޮޖް ގޭގައެވެ.
މިރޭ މި ހުޅުވުނު ލައުންޖަކީ ޒުވާނުން އެއްތަނަކުން ބައްދަލުވެ ޕީއެސް އާއި ރާޒުވާ އަދި ކެރަމް ފަދަ އެކިއެކި ކުޅިވަރުތައް ކުޅެވޭނެ އިންތިޒާމް ހަމަޖެހިފައިވާ ޒުވާނުންގެ ލައުންޖެކެވެ.
ލައުންޖް ހުޅުވައިދެއްވުމަށްފަހު ނާޒިމް ވިދާޅުވީ އެމްއެންޕީއަކީ ޒުވާނުންގެ ޕާޓީއެއް ކަމަށެވެ. އަދި އެމްއެންޕީގެ އަމާޒަކީ ފުދުންތެރި ޒުވާނުންތަކެއް އުފެއްދުން ކަމަށް ވިދާޅުވިއެވެ. އަދި ޒުވާނުންނަކީ ދިވެހި ގައުމުގެ މުސްތަގުބަލް ކަމުން ކޮންމެ ޒުވާނަކުވެސް ޒިންމާދާރު ޒުވާނަކަށް ވާން އަޒުމު ކަނޑައަޅަން ނާޒިމް ގޮވާލެއްވިއެވެ.
އަދި ލައުންޖުގެ ބޭނުން ފުރިހަމަ ގޮތުގައި ހިފުމަށް ޕާޓީގެ ޒުވާނުންނަށް އިލްތިމާސް ކުރެއްވިއެވެ.
އެމްއެންޕީ އުފެއްދުމަށް ފަހު މިވަގުތު އެންމެ ހަރަކާތްތެރި ޕާޓީއެއްގެ ގޮތުގައި އޮތީ އެ ޕާޓީއެވެ. އެ ޕާޓީން ވަނީ 10،000 މެންބަރުން ހަމަކުރުމަށް ހާއްސަ ކެންޕެއިނެއް ފަށާފައެވެ.