ކޮވިޑް-19 އަށް ފަރުވާ ހޯދަމުން އައި ދޮށީ އުމުރުގެ މީހަކު މަރުވެއްޖެ އެވެ.
އެޗްޕީއޭ އިން ދެންމެ ބުނީ މިއަދު އިރުއޮއްސި 6:17 ގައި މަރުވެފައިވަނީ އުމުރުން 95 އަހަރުގެ ދިވެހި ފިރިހެނެއް ކަމަށެވެ. މިއީ ކޮވިޑަށް ޕޮޒިޓިވްވެ ފަރުވާއަށް ހުޅުމާލެ މެޑިކަލް ފެސިލިޓީއަށް ގެންގޮސްފައި އޮތް މީހެކެވެ.
މި މަރާއެކު ރާއްޖޭގެ ކޮވިޑް މަރުގެ ނަންބަރު ވަނީ 276 އަށް އަރާފައެވެ. މިއީ މި މަހުގެ 13 ވަނަ މަރެވެ.
ރާއްޖޭގައި ކޮވިޑަށް ޕޮޒިޓިވްވާ މީހުންގެ ނިސްބަތްވެސް ވަނީ ވަރަށް ބޮޑަށް އިތުރުވަމުންނެވެ. މިހާތަނަށް 136،126 މީހަކަށް ވަނީ ބަލި ޖެހިފައެވެ. އޭގެ ތެރެއިން 17،589 މީހަކު އަދިވެސް ބަލީން ފަސޭހަނުވެ އެވެ. ބަލީން ފަސޭހަވީ މީހުންގެ އަދަދަކީ 118،249 އެވެ.
އިއްޔެ މި ބައްޔަށް 2،838 މީހަކު ޕޮޒިޓިވްވިއެވެ.
