ތ. ދިޔަމިގިލީގައި އެ ރަށު މުދިމަށް ހަމާލާދީ ޒަހަމްކޮށްލާ މަންޒަރު ފެންނަ ވީޑިއޯއެއް އާންމުވެއްޖެ އެވެ.
"އެމްވީ ކްރައިސިސް" އިން އާންމުކޮށްފައިވާ އެ ވީޑިއޯގައި ޒުވާނަކު އެތައް ފަހަރަކު މުދިމަށް ހަމަލާ ދޭ މަންޒަރު ފެނެއެވެ. ފުރަތަމަ ހަމަލާ ދިނުމަށް ފަހު ވަކި ހިސާބަކަށް ގޮސް އެނބުރި އައިސް އަލުން ހަމަލާދޭ މަންޒަރު ފެނެއެވެ.
އޭރު އެ މީހާ އޮންނަނީ ބައިސްކަލާއެކު ވެއްޓިފައެވެ. އަދި އޭނާގެ ހަށިގަނޑަށް އެތައް ފަހަރަކު ވަޅިއަކުން ހަމަލާ ދިނުމަށް ފަހު އެ ޒުވާނާ ދަމުން އެ ސަރަހައްދުގައި ހުންނަ ބަސްތާއެއްގައި ވަޅި ހާލާކާ އެ ވަޅި ސާފުކުރާ މަންޒަރު ފެނެއެވެ.
ވީޑިއޯއަށް ކޮމެންޓްކުރި އެތައް ބަޔަކު ވަނީ ރަހުމެއް ނެތި މިފަދަ ލާއިންސާނީ ހަމަލާތައް ދޭ މީހުންގެ މައްސަލަތައް ސީރިއަސްކޮށް ބެލުމަށް ގޮވާލާފައެވެ. އަދި މިފަދަ މައްސަލަތަކަށް އޮތް ހައްލަކީ ފުރިހަމަ އިސްލާމީ ޝަރީއަތެއް ކަމަށް ވަނީ ބުނެފައެވެ.
ފުލުހުން މިއަދު ބުނީ މި މައްސަލަ ރިޕޯޓުކޮށްފައިވަނީ މިއަދު ހެނދުނު ކަމަށެވެ. މި ހާދިސާއާއި ގުޅިގެން ދިވެހި ފިރިހެނަކު ހައްޔަރުކޮށްފައިވާ ކަމަށް ފުލުހުން ވަނީ ބުނެފަ އެވެ.
އިތުރަށް ބުނެފައި ވަނީ މި މައްސަލަ ތަހުގީގުކުރަމުން އަންނަ ކަމަށެވެ. އިތުރު ތަފްސީލެއް ހާމައެއް ނުކުރެ އެވެ.
އެރަށު މީހަކު މައުލޫމާތު ދިން ގޮތުގައި ވަޅިއަކުން ހަމަލާ ދީފައި ވަނީ އެރަށު މުދިމްކަން ކުރަމުން އަންނަ އަހުމަދު ރަޝީދަށެވެ.