ދިޔަމިގިލީ މުދިމުގެ ގަޔަަސް ވަޅި ޖެހި މީހާ ޝަރީއަތް ނިމެންދެން ބަންދުގައި ބެހެއްޓުމަށް އަމުރުކޮށްފި އެވެ.
ދިވެހި ފުލުހުންގެ ހިދުމަތުން ދެންމެ ބުނީ ދިޔަމިގިލިން ހައްޔަރުކުރީ 35 އަހަރުގެ ދިވެހި ފިރިހެނެއް ކަމަށާ އޭނާގެ ބަންދާމެދު ގޮތް ނިންމަން މަޑިފުށީ ކޯޓަށް ހާޒިރު ކުރުމުން ޝަރީއަތް ނިމެންދެން ބަންދުގައި ބެހެެެއްޓުމަށް އަމުރުކޮށްފައިވާ ކަމަށެވެ.
ވަޅި ޖެހުމުން ޒަހަމުވި މުދިމު މީހާ އިތުރު ފަރުވާއަށް މާލެ ގެނެސް އައިޖީއެމްއެޗްގައި ދަނީ ފަރުވާ ދެމުންނެވެ. އޭނާގެ ހަށިގަނޑުގެ ހަތް ތާކަށް ވަނީ ވަޅިން ހަމަލާދީފައެވެ. ބައެއް ތަންތަން ވަރަަށް ފުންކޮށް ޒަހަމުވެފައިވެއެވެ.
ތ. ދިޔަމިގިލީގައި އެ ރަށު މުދިމަށް ހަމާލާދީ ޒަހަމްކޮށްލާ މަންޒަރު ފެންނަ ވީޑިއޯއެއް ވަނީ އާންމުވެފައެވެ.
"އެމްވީ ކްރައިސިސް" އިން އާންމުކޮށްފައިވާ އެ ވީޑިއޯގައި ޒުވާނަކު އެތައް ފަހަރަކު މުދިމަށް ހަމަލާ ދޭ މަންޒަރު ފެނެއެވެ. ފުރަތަމަ ހަމަލާ ދިނުމަށް ފަހު ވަކި ހިސާބަކަށް ގޮސް އެނބުރި އައިސް އަލުން ހަމަލާދޭ މަންޒަރު ފެނެއެވެ.
އޭރު އެ މީހާ އޮންނަނީ ބައިސްކަލާއެކު ވެއްޓިފައެވެ. އަދި އޭނާގެ ހަށިގަނޑަށް އެތައް ފަހަރަކު ވަޅިއަކުން ހަމަލާ ދިނުމަށް ފަހު އެ ޒުވާނާ ދަމުން އެ ސަރަހައްދުގައި ހުންނަ ބަސްތާއެއްގައި ވަޅި ހާލާކާ އެ ވަޅި ސާފުކުރާ މަންޒަރު ފެނެއެވެ.