ލޯކަލް ކައުންސިލްތަކުން ހަދަންޖެހޭ ލޭންޑް ޔޫސް ޕްލޭންތައް ހެދުމުގައި އިންޑިއާގެ މާލީ އެހީތެރިކަން ހޯދަން ލޯކަލް ގަވަމަންޓް އޮތޯރިޓީ (އެލްޖީއޭ) އިން ނިންމައިފި އެވެ.
ލާމަރުކަޒީ ގާނޫނުގައިވާ ގޮތުން ކައުންސިލްތަކުން ހުވާކުރާތާ ތިންމަސް ތެރޭގައި ކައުންސިލްތަކުން ލޭންޑް ޔޫޒް ޕްލޭން ހަދައި ހުށަހަޅަންޖެހެ އެވެ. ގާނޫނުގައި އެކަން ކުރަން ވަކި ގޮތްތަކެއް ހަމަޖައްސާފައިވާއިރު ކޮވިޑާ ގުޅިގެން އެލްޖީއޭ އިން ވަނީ ޕްލޭން ނިންމަން ތިން މަހުގެ އިތުރަށް ވެސް މުއްދަތު ދީފަ އެވެ. ނަމަވެސް އެލްޖީއޭ އިން ފަހުން ދިން މުއްދަތުގައި ވެސް ގިނަ ކައުންސިލްތަކަށް އެކަން ކުރެވިފައެއް ނުވެ އެވެ.
ލޭންޑް ޔޫޒް ޕްލޭން ނުނިމި 44 ރަށެއް އޮތް އިރު ޕްލޭން ނިންމާ ހުށަހެޅި ބައެއް ކައުންސިލްތަކުގެ ޕްލޭންގައި ވެސް މައްސަލަތަކެއް ހުރިކަމަށް އެލްޖީއޭ އިން މައުލޫމާތުދެ އެވެ.
އެލްޖީއޭ އިން ބުނީ ލޭންޑް ޔޫޒް ޕްލޭން ހެދުމަށް ފަންނީ މީހުން އެކަށީގެންވާ އަދަދަކަށް ރާއްޖޭގައި ނެތުމާ ގުޅިގެން އިންޑިއާގެ މާލީ އަދި ފަންނީ އެހީ ހޯދަން ރާއްޖޭގައި ހުންނަ އިންޑިއާގެ ހައިކޮމިޝަނަށް ހުށަހަޅާފައިވާ ކަމަށެވެ. އިންޑިއާގެ އެހީ ލިބޭނެ ކަމުގެ އުއްމީދު ބޮޑު ކަމަށްވެސް ވިދާޅުވި އެވެ.
މިސަރުކާރު ވެރިކަމާ ހަވާލުވެ ލާމަރުކަޒީ ގާނޫނަށް ގިނަ އިސްލާހުތަކެއް ގެނެސް ލޯކަލް ކައުންސިލްތަކަށް ބޮޑެތި ބާރުތަކެއް ދީފައިވެ އެވެ.