ހުޅުމާލޭ ހޮސްޕިޓަލުގައި ތެލަސީމިއާއަށް ޓެސްޓުކުރުމުގެ ހިދުމަތް މިއަދުން ފެށިގެން ދޭން ފަށައިފި އެވެ.
ހުޅުމާލެ ހޮސްޕިޓަލުގައި މިއަދު ބޭއްވި ރަސްމިއްޔާތެއްގައި ހިދުމަތް އިފްތިތާހުކޮށްދެއްވީ ހެލްތު މިނިސްޓަރު އިރުތިޝާމް އާދަމް އެވެ.
ހުޅުމާލޭގައި ތެލެސީމިއާ ޓެސްޓް ހެދުމުގެ ހިދުމަތް ފެށުމާ ބެހޭ ގޮތުން އެ ހޮސްޕިޓަލުގެ މެނޭޖިން ޑިރެކްޓަރު އަހުމަދު ޝާކިރު ވިދާޅުވީ، ހިދުމަތުގެ ސަބަބުން ހުޅުމާލޭގެ ރައްޔިތުންނަށް ވަރަށް ބޮޑު ފަސޭހައެއް ލިބޭނެ ކަމަށެވެ. ޓެސްޓްހަދަން މާލެ ދާންޖެހޭ މިންވަރު ވަރަށް ބޮޑަށް މަދުވާނެ ކަމަށް ޝާކިރު ވިދާޅުވި އެވެ.
ޝާކިރު ވިދާޅުވީ ހުޅުމާލޭގެ ރައްޔިތުންނަށް ހޮސްޕިޓަލުންދޭ ހިދުމަތްތައް ފުޅާކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ހޮސްޕިޓަލްގެ އެންއައިސީޔޫއެއް ހުޅުވުމާއި، މިހާރު އެ ހޮސްޕިޓަލުން ނުހެދޭ ބައެއް އާދައިގެ ޓެސްޓުތައް އައިޖީއެމްއެޗް ހޮސްޕިޓަލާއި ގުޅިގެން އެ ހޮސްޕިޓަލުން ހެދޭނެ އިންތިޒާމް ހަމަޖެއްސުމަށް ވެސް މަސައްކަތް ކުރަމުންދާ ކަމަށް ވިދާޅުވި އެވެ.
މިނިސްޓަރު އިރުތިޝާމް އާދަމް ވިދާޅުވީ، ހުޅުމާލެއިން ތެލަސީމިއާ ސްކްރީން ކުރުމުގެ ފުރުސަތު ފަހިވެގެން ދިއުމަކީ ތެލަސީމިއާ މީހުން މަދުކުރަން ވެސް އެޅޭ ފިޔަވަޅެއް ކަމަށެވެ. މި ހިދުމަތް އަވަސް މުއްދަތެއްގައި ރާއްޖޭގެ ގިނަ ރަށްތަކަކަށް ފޯރުކޮށްދޭން މަސައްކަތްކުރައްވާ ކަމަށް ވެސް އިރުތިޝާމް ވިދާޅުވި އެވެ.
ހުޅުމާލޭގެ އިތުރުން މިހާރުވެސް ރާއްޖޭގެ ހަ ރަށެއްގައި ތެލަސީމިއާ ޓެސްޓް ހެދޭނެ ވަސީލަތް ވަނީ ގާއިމް ކޮށްފަ އެވެ. ހުޅުމާލެ ހޮސްޕިޓަލުގައި ތެލަސީމިއާ ޓެސްޓް ހެއްދޭނީ ކޮންމެ ހަފްތާއެއްގެވެސް އަންގާރަ ދުވަހު ހެނދުނު 9:00 އިން މެންދުރު 2:00 އަށެވެ. ނަމަވެސް ހޮސްޕިޓަލްގެ ބައެއް އިންފްރާސްޓްރަކްޗާ ނިމި، މުވައްޒަފުން އިތުރުވާ މިންވަރަކުން ޓެސްޓް ހަދައިދޭ ދުވަސްތައް އިތުރުކުރާނެ ކަމަށް އެ ހޮސްޕިޓާލުން ބުންޏެވެ.
ހުޅުމާލެ ހޮސްޕިޓަލުގައި ތެލަސީމިއާ ޓެސްޓު ކުރުމުގެ ހިދުމަތް ފެށުމުގެ ރަސްމިއްޔާތުގެ ތެރެއިން --