ބައިނަލްއަގުވާމީ މައިދާނުގައްޔާއި ސިޔާސީ މައިދާނުގައި ދިމާވާ އެކި މައްސަލަތަކުގައި އިންޑީއާއިން އަބަދުވެސް ރާއްޖެއަށް އެހީތެރިވާނެ ކަމަށް އިންޑިއާގެ ބޮޑުވަޒީރު ނަރެންދްރަ މޯދީގެ ހާއްސަ މަންދޫބް އަދި އެގައުމުގެ ފޮރިން ސެކެޓްރީ ސުބްރަމާނިޔަމް ޖައިޝަންކަރް ވިދާޅުވެއްޖެ އެވެ.
ރަސްމީ ދަތުރުފުޅެއްގައި ރާއްޖެއަށް މިހާރު ވަޑައިގެން އުޅުއްވާ އިންޑިއާގެ ފޮރިން ސެކެޓްރީ ވަނީ މިއަދު ރައީސް އަބްދުﷲ ޔާމީން އާ ބައްދަލުކުރައްވާފަ އެވެ. އެ ބައްދަލުވުމުގައި ރާއްޖެއާ އިންޑިއާއާ ދެމެދު އޮތް ގުޅުން މިހާރަށްވުރެ ބޮޑަށް ހަރުދަނާ ކުރުމާ ބެހޭގޮތުން ދެބޭފުޅުން ގިނަ މަޝްވަރާތަކެއް ކުރެއްވި ކަމަށް ރައީސް އޮފީހުން ބުންޏެވެ.
ރައީސް އޮފީހުން ބުނީ، ރާއްޖެއާއި އިންޑިއާ އާ ދެމެދު އޮތް ޒަމާންވީ ގުޅުން އެކި ދާއިރާތަކުން ބަދަހިކުރުމާ ބެހޭގޮތުން މިއަދުގެ ބައްދަލުވުމުގައި އިންޑިއާ ސަރުކާރުގެ ފޮރިން ސެކްރެޓަރީއާ ރައީސް ވަރަށް ބޮޑަށް މަޝްވަރާކުރެއްވި ކަމަށެވެ. އެގޮތުން ޖައިޝަންކަރް ވަނީ އެކި ދާއިރާތަކުން ރާއްޖެއަށް ވެދެވެން އޮތް ހުރިހާ އެހީއެއް ވެދިނުމަށް އިންޑިއާއިން ތައްޔާރަށް އޮތް ކަމަށް ވިދާޅުވެފައެވެ.
ބައިނަލް އަގުވާމީ މަސްރަހުގައި ހިނގާ އެކި ކަންކަމުގައްޔާއި ތައުލީމާއި ސިއްހަތާއި ސިޔާސީ ދާއިރާ ފަދަ އެތައް ދާއިރާއަކުން ރާއްޖެއަށް އެހީތެރިވެދިނުމަށް އިންޑިއާ ތައްޔާރަށް އޮތްކަމުގެ ޔަގީންކަން ޖައި ޝަންކަރާއި ދެއްވި ކަމަށް ރައީސް އޮފީހުން ބުންޏެވެ.
"..ސިއްހީ ދާއިރާގެ އިތުރުން ސަރަޙައްދީ ޓެރަރިޒަމް ނައްތާލުމައްޓަކައި މަސައްކަތްކުރެއްވުމާ ބެހޭގޮތުން ވެސް މިބައްދަލުވުމުގައި ދެބޭފުޅުން މަޝްވަރާކުރެއްވިއެވެ. އިންޑިޔާ ސަރުކާރުގެ ފޮރިން ސެކްރެޓަރީ ދެއްކެވި ވާހަކަފުޅުގައި އިންޑިޔާއިން ރާއްޖޭގެ ކަންތައްތަކުގައި އަބަދުވެސް އެއްބާރުލުން ދެއްވާނެކަމުގެ ޔަގީންކަން ރައީސުލްޖުމްހޫރިއްޔާއަށް ދެއްވިއެވެ،" ރައީސް އޮފީހުން ބުންޏެވެ.
އިންޑިއާގެ ފޮރިން ސެކެޓްރީ ޑރ. ޖައި ޝަންކަރް ރާއްޖެ ވަޑައިގެންނެވީ މިއަދު މެންދުރުގެ ވަގުތެއްގަ އެވެ. އެ މަނިކުފާނަށް ރާއްޖޭގެ އެއާޕޯޓުން މަރުހަބާ ދެންނެވީ ފޮރިން ސެކްރެޓަރީ އަލީ ނަސީރާއި އިންޑިއާ އިން ރާއްޖެއަށް ކަނޑައެޅުއްވި އާ ސަފީރެވެ.
ޖައިޝެންކަރު ވަނީ މިދިޔަ އަހަރުގެ ފަހުކޮޅު ވެސް ރާއްޖެއަށް ދަތުރުފުޅެއް ކުރައްވައިފަ އެވެ. އެހެން ނަމަވެސް އެފަހަރު ބައްދަލު ކުރެއްވީ، އޭރުގެ ނައިބު ރައީސް އަހުމަދު އަދީބާ އެވެ. އިންޑިއާ އިން ހާމަކޮށްފައިވާ ގޮތުގައި ޖައިޝެންކަރު ރާއްޖެ ވަޑައިގަންނަވަނީ ރައީސް ޔާމީންއާ ބައްދަލު ކުރެއްވުމަށެވެ. ދަތުރު ނިންމާލައްވާނީ އަންގާރަ ދުވަހު އެވެ.
