ޝާލޮކް ހޯމްސްގެ ކޮއްކޮއަށް ބިނާކޮށްފައިވާ "އެނޯލާ ހޯމްސް 2" ނެޓްފްލިކްސްއަށް އަންނަ މަހު ހަތަރެއްގައި އަންނަނީ އެވެ.
އާތާ ކޮނަން ޑޮއިލްގެ، ޝާލޮކް ހޯމްސް ކެރެކްޓާއާ ގުޅުވައި ނެންސީ ސްޕްރިންގާ 2006ގައި "އެނޯލާ ހޯމްސް"ގެ ނަމުގައި ޝާލޮކްގެ 14 އަހަރުގެ ކޮއްކޮގެ ކެރެކްޓާ އުފައްދައި، ވާހަކަ ސީރީޒެއް ނެރުނެވެ.
"އެނޯލާ ހޯމްސް" ފިލްމަކީ މި ސިރީޒްއަށް ބިނާކޮށްފައިވާ ފިލްމެކެވެ.
މި ފިލްމުގެ ޓްރޭލާ އިން ފެންނަ ގޮތުގައި، އެނޯލާ ފުރަތަމަ ފިލްމުގައި ނިންމާ މައްސަލައަށް ފަހު، އެނޯލާ ލަންޑަންގައި ޝާލޮކް ގޮތަށް އިތުރު މައްސަލަތައް ހޯދުމަށް މަސައްކަތް ކުރެ އެވެ. ނަމަވެސް އެ ޒަމާނުގައި މަތީ ފަންތީގެ އަންހެން ކުއްޖަކު އެފަދަ މަސައްކަތެއް ކުރަން އުޅުމުން، އެއްވެސް މައްސަލައެއް ނުދީ އެނޯލާއަށް މީހުންގެ ފާޑުކިޔުން ކުރިމަތިވެ އެވެ. ދެން ފެކްޓްރީއެއްގައި މަސައްކަތްކުރާ އަންހެން ކުއްޖަކު އޭނާގެ ގެއްލިގެން އުޅޭ ދައްތަ/ކޮއްކޮ ހޯދުމަށް އާދެ އެވެ.
އެނޯލާ މި މައްސަލަ ހައްލުކުރަން އުޅުމުގެ ތެރޭގައި ނުރައްކާތަކަކާ ކުރިމަތިވެފައި ވަނިކޮށް ޝާލޮކްއާ ދިމާވެ އެވެ. އެންމެ ފަހުން ދެބެންވެސް ހައްލުކުރަން އުޅެނީ އެއް މައްސަލައެއް ކަން އެނގެ އެވެ.
ހެރީ ބްރެޑްބިއާ ޑައިރެކްޓްކުރި މި ފިލްމުގައި އެނޯލާ ހޯމްސްގެ ރޯލް އަދާކުރަނީ މިލީ ބޮބީ ބްރައުން އެވެ.
އަނެއްކާވެސް ޝާލޮކްގެ ރޯލް ހެންރީ ކެވިލް އަދާކުރާއިރު، މި ދެބެންގެ މަންމަގެ ރޯލް އަދާކުރަނީ ހެލީނާ ބޮންހަމް-ކާޓާ އެވެ. އަދި ފުރަތަމަ ފިލްމުން އިތުރު ކެރެކްޓާތައް މި ފިލްމުގައިވެސް ފެނިގެންދާނެ އެވެ.
މިލީ ބޮބީ ބްރައުން ބުނީ އޭނާ "އެނޯލާ ހޯމްސް" ކުޅުމުގެ ކުރިން މި ފްރެންޗައިޒްގެ އެއް ފިލްމު ކުޅެން ނިންމައިގެން ހުރި ނަމަވެސް، މި ފިލްމްގެ ޝޫޓިން ފެށުމުން އިތުރަށް މި ކެރެކްޓާ ކުޅެން ޝައުގުވެރިވި ކަމަށެވެ.