މޯލްޑިވްސް ރެޑް ކްރެސެންޓުން ތުރުކީއާއި ސީރިއާގައި ހާލުގައި ޖެހިފައިވާ މީހުންނަށް އެހީވާން ހުޅުވާލި ފަންޑަށް 2.9 މިލިއަން ރުފިޔާ ލިބިއްޖެ އެވެ.
ރެޑް ކްރެސެންޓުން އިއްޔެ ނެރުނު ނޫސް ބަޔާނެއްގައި ބުނެފައިވަނީ ތުރުކީއާއި ސީރިއާ ގުޅޭ ސަރަހައްދަށް އައި ބިން ހެލުމުގައި ހާލުގައި ޖެހުނު މީހުންނަށް އެހީވުމަށް ހުޅުވާލި ރިލީފް ފަންޑަށް ޖުމުލަ 2،990،618.91 ރުފިޔާ ލިބިފައިވާ ކަމަށެވެ.
ރެޑް ކްރެސެންޓުން ރިލީފް ފަންޑަށް ފައިސާ ހޯދަން ހުޅުވާލީ މިމަހުގެ ހަތްވަނަ ދުވަހުން ފެށިގެން 14 ވަނަ ދުވަހުގެ ނިޔަލަށެވެ.
ރެޑް ކްރެސެންޓުން ބުނީ ރިލީފް ފަންޑެއް ހުޅުވާލީ އިންޓަނޭޝަނަލް ފެޑެރޭޝަން އޮފް ރެޑް ކްރޮސް އެންޑް ކްރެސެންޓް ސޮސައިޓީސް (އައިއެފްއާރްސީ) އިން ހާލުގައި ޖެހުނު މީހުންނަށް އެހީވުމަށް 200 މިލިއަން ޑޮލަރުގެ އިމަޖެންސީ އެހީގެ އިލްތިމާސެއް ނެރުމުން ކަމަށެވެ.
އެހީގެ ގޮތުގައި ލިބުނު ފައިސާ އައިއެފްއާރްސީ އާއި ހަވާލުކުރުމުގެ މަސައްކަތް ފަށާފައިވާ ކަމަށްވެސް ރެޑް ކްރެސެންޓުން ވަނީ ބުނެފަ އެވެ.