ތިލަމާލެ ބްރިޖު މަޝްރޫއު ކުރިއަށްދަނީ ލަހުން ކަމަށް ގަބޫލުކުރައްވާ ކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
މިނިސްޓަރު އަސްލަމް މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ތިލަމާލެ ބްރިޖު މަޝްރޫއާއި ގުޅޭ ގޮތުން މާފަންނު މެދު ދާއިރާގެ މެންބަރު އިބްރާހީމް ރަޝީދު ކުރެއްވި ސުވާލަކަށް ޖަވާބު ދެއްވަމުންނެވެ.
"ކޮންޓްރެކްޓާގެ މަސައްކަތުގެ ޝެޑިއުލްއަށް ބަލާފައި އެބަހުރި ޑިލޭސް. މިހާތަނަށް އަންނަންވާ ހިސާބަށްނޫން އައިސްފަ ހުރީ،" އަސްލަމް ވިދާޅުވި އެވެ.
މަޝްރޫއުގައި ލަސްވުމެއް އުޅުނު ނަމަވެސް މަޝްރޫއަށް އިތުރު ވަގުތު އަދި ނުދޭ ކަމަށް އަސްލަމް ވިދާޅުވި އެވެ.
މިނިސްޓަރު އަސްލަމް ވިދާޅުވީ މަޝްރޫއުގެ ކޮންޓްރެކްޓްގެ މުއްދަތަކީ މިހާރުވެސް ކަނޑައަޅާފައިވާ މުއްދަތު ކަމަށާއި ޑިލޭވި މަސައްކަތުން ބައެއް ކޮންޓްރެކްޓްގެ މުއްދަތުގެ ތެރޭގައި ހާސިލު ކުރެވޭނެ ކަމަށެވެ.
"ކެޗަޕް ކުރެވޭނެ ކޮންމެވެސް ވަރަކަށް. ފުލީ ކެޗަޕް ނުކުރެވިދާނެ. އަދި އަޅުގަނޑުމެން ޓައިމް އެކްސްޓެންޝަނެއް ދޭކަށް ގަސްތެއް ނުކުރަން،" އަސްލަމް ވިދާޅުވި އެވެ.
އަސްލަމް ވިދާޅުވީ ބްރިޖު މަޝްރޫއު މިހާރުވެސް ކުރިއަށްދާ ކަމަށާއި އެގޮތުން ގުޅީފަޅު ކާސްޓިން ޔާޑުގައި ޑެކް ސެކްޝަންތައް ހަދަމުންދާ ކަމަށެވެ.
މިނިސްޓަރު އަސްލަމް ވިދާޅުވީ ތިލަމާލެ ބްރިޖު މަސައްކަތަށް އެންމެ ފުރަތަމަ ޖެހި ދެ ތަނބަކީ ޓެސްޓު ދެ ތަނބު ކަމަށާއި އޭގެ ފަހުން ޖަހަމުންދާ ތަނބުތަކަކީ ބްރިޖުގެ އަސްލު ތަނބުތައް ކަމަށެވެ.