އިންޑިއާ ކަނޑުގެ ގައުމުތަކާ މެދު ޗައިނާ ސަރުކާރުން ގެންގުޅެމުންދާ ސިޔާސަތުތަކާ މެދު އެ ގައުމުން އަލުން ވިސްނަމުންދާ ތަން ފެނުމަކީ ހިތްވަރު ލިބޭ ކަމެއް ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ކުރީގެ ރައީސް އަދި އިދިކޮޅު އެމްޑީޕީގެ ރައީސް ނަޝީދު އެގޮތަށް ވިދާޅުވީ އެމަނިކުފާނު މިއަދު ކުރެއްވި ޓްވީޓެއްގައި އެވެ.
ނަޝީދު އެގޮތަށް ވިދާޅުވިއިރު އަސްކަރީ ބޭސްއެއް އެޅުމަށް ލ. އަތޮޅުން ބިމެއް ޗައިނާއަށް ދޭން އުޅޭ ކަމަށް ބުނެ ނަޝީދު ދައްކަވާފައިވާ ވާހަކަ ޗައިނާއިން ރޭ ވަނީ ދޮގުކޮށްފަ އެވެ. ނަޝީދު ވިދާޅުވެފައިވާ ގޮތުގައި 99 އަހަރަށް ދޫކުރާ އެ ބިމުގެ ބަދަލުގައި ދެ ބިލިއަން ޑޮލަރު ރާއްޖެއަށް ދޭން ދެ ގައުމުން އޮތީ އެއްބަސްވެފަ އެވެ.