ނިމިދިޔަ އެމްޑީޕީ ސަރުކާރުން ކުރިއަށް ގެންދިޔަ ބިންވެރިޔާ ސްކީމުގެ ތެރެއިން ގޯތި ލިބޭ މީހުންގެ ލިސްޓް އެކުލަވާލާފައިވަނީ ބޭއިންސާފުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެކްސްގައި މިއަދު ކުރެއްވި ޕޯސްޓެއްގައި ނަޝީދު ވިދާޅުވީ ކުރީގައިވެސް ލިސްޓް ހަދާފައިވަނީ ބޭއިންސާފުން އެތައް ބަޔަކަށް ގޯތި ލިބޭ ގޮތަށް ކަމަށެވެ.
"މިފަހަރު އަނެއްކާވެސް އެ ބޭއިންސާފަށް އިތުރު ބޮޅެއް އެކުލަވާލެވުނީ،" ނަޝީދު ވިދާޅުވި އެވެ.
ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކު ގޯތި ލިބުނު ކަމަށް ހަދައިގެން ލިޔުންތަކެއް އުފެއްދި މައްސަލަތަކެއްގައި ފުލުހުން ގެންދަނީ ހައުސިން މިނިސްޓްރީއާއި އެޗްޑީސީގެ އިސްވެރިންގެ މައްސަލަތަކެއް ތަހުގީގުކުރަމުންނެވެ.
ތަހުގީގު ފެށިއިރު އެޗްޑީސީގެ މެނޭޖިން ޑިރެކްޓަރުގެ ގޮތުގައި ހުންނެވި ފަޒުލް ރަޝީދު ވަނީ މިދިޔަ ހޮނިހިރު ދުވަހު އިސްތިއުފާ ދެއްވާފަ އެވެ. ފަޒުލްގެ އިސްތިއުފާއާ ގުޅިގެން އެޗްޑީސީގެ މެނޭޖިން ޑިރެކްޓަރުގެ މަގާމަށް އިއްޔެގެ ވަގުތެއްގައި ވަނީ ހުޅުމާލެ ވުޖޫދަށް ގެނައި އިރު އެ މަސައްކަތުގައި އަމަލީގޮތުން އުޅުއްވި ކުރީގެ ވަޒީރު މައުރޫފް ޖަމީލް ހަމަޖައްސާފަ އެވެ.
ފުލުހުން ކުރިއަށް ގެންދާ ތަހުގީގާއި އެޗްޑީސީގެ މެނޭޖިން ޑިރެކްޓަރުގެ މަގާމަށް އައި ބަދަލާ ގުޅޭގޮތުންވެސް ނަޝީދު ވަނީ ވާހަކަދައްކަވާފަ އެވެ. އެގޮތުން ރައީސް ނަޝީދު ވިދާޅުވީ ފުލުހުން މިފަހަރު ރަނގަޅު ތަހުގީގެއް ހިންގާނެ ކަމަށް ގަބޫލުކުރައްވާ ކަމަށެވެ. އަދި މައުރޫފް ޖަމީލްވެސް ކަންކަން އިސްލާހު ކުރައްވާނެ ކަމަށް ދެކެވަޑައިގަންނަވާ ކަމަށް ވިދާޅުވި އެވެ.