ހުރިހާ މުސްލިމުން އެއްބައިވަންތަކަން ބަދަހިކުރުމަށް ހައްޖު ހުތުބާގައި އިސްލާމީ އުއްމަތަށް ނަސޭހަތްތެރިވެއްޖެ އެވެ.
ޝެއިހް ޔޫސުފް ބިން މުހައްމަދު ބިން ސައީދު މިއަދު އިއްވެވި ހައްޖު ހުތުބާގައި އެއްބައިވަންތަކަން ބަދަހިކުރުމުގެ މުހިންމުކަން ހަނދާންކޮށްދެއްވާފަ އެވެ.
މުސްލިމުން އެކަކު އަނެކަކަށް އެހީތެރިވުމުގެ މުހިންމުކަން ފާހަގަކުރައްވާ މުއްސަނދިންގެ މުދަލުން ފަގީރުންނަށް އެހީތެރިވުމަށް ގޮވާލެއްވި އެވެ.
މުއްސަނދިންގެ މުދަލުން ބަޔަކީ ފަގީރުންގެ ހައްގެއްކަން މާތްﷲ އަމުރުކުރައްވާފައިވާ ކަމަށް ޝެއިހް ޔޫސުފް އިއްވެވި ހައްޖު ހުތުބާގައި ވިދާޅުވި އެވެ.
ދޮން މީހެއް، ކަޅު މީހެއްގެ މައްޗަށް މާތް ކުރައްވާފައިނުވާ ކަމަށްވެސް ހުތުބާގައި ވިދާޅުވި އެވެ.
ސައުދީގެ ހައްޖު އެންޑް އުމްރާ މިނިސްޓްރީން ބުނި ގޮތުގައި މި އަހަރު ދެ މިލިއަނަށްވުރެ ގިނަ މީހުން ހައްޖުގެ އަޅުކަން އަދާކުރެ އެވެ. މީގެ ތެރޭގައި ސައުދީގެ ދެ ލައްކަ މީހުންވެސް ހިމެނެ އެވެ.
