ކުރީގެ ރައީސް އަބްދުﷲ ޔާމީންގެ ގާނޫނީ ޓީމުގައި ހިމެނޭ ވަކީލް އާދަމް އާސިފް އެމްޑީޕީއަށް ސޮއިކުރައްވައިފި އެވެ.
އާސިފް ޕީޕީއެމް އިން ވަކިވެފައިވާ ކަމަށް އެ ޕާޓީން ވަނީ އަވަސް އަށް ޔަގީންކޮށްދީފަ އެވެ.
އެމްޑީޕީއަށް އާސިފް ސޮއިކުރެއްވި ސީދާ ދުވަހެއް ސާފުވާ ގޮތެއް ނުވި އެވެ. ނަމަވެސް އޭނާ ސޮއިކުރެއްވި ކަން އެމްޑީޕީ ހާމަކުރީ މިއަދު އެވެ.
އާސިފަކީ ރައީސް ޔާމީންގެ ގާނޫނީ ޓީމުގައި ހިމެނޭ ވަކީލެއްގެ އިތުރުން ޕީޕީއެމްގެ އިސްތިއުނާފް ކޮމެޓީގެ ނައިބު މުގައްރަރެވެ.
އާސިފް ވަނީ ޕީޕީއެމްގެ މުޒާހަރާތަކުގައި ހައްޔަރުކުރާ މީހުން މިނިވަންކުރުމަށް ވަކީލެއްގެ ގޮތުގައި ވަރަށް ބުރަކޮށް މަސައްކަތް ކުރައްވާފަ އެވެ.
އޭނާ ކުއްލި ގޮތަކަށް ޕީޕީއެމް އިން ވަކިވި ސަބަބެއް ސާފުވާ ގޮތެއް ނުވި އެވެ.