ޓެކްސީ ޑްރައިވަރުންނަށް ހާއްސަ ގައުމީ ދަފްތަރެއް އެކުލަވާލަން ނިންމައިފި އެވެ.
ވަޒީރުންގެ މަޖިލީހުގެ ނިންމުންތައް މިއަދު ހިއްސާކުރައްވަމުން ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް ވިދާޅުވީ ޓެކްސީ ޑްރައިވަރުންނަށް ހާއްސަ ގައުމީ ދަފްތަރެއް އެކުލަވާލައި ޑްރައިވަރުން ރަސްމީ އޮނިގަނޑަކަށް ފެއްތުމުގެ މަސައްކަތްތަކެއް ފަށަން ސަރުކާރުން ނިންމާފައިވާ ކަމަށެވެ.
ޓްރާންސްޕޯޓް މިނިސްޓްރީން އެކުވަލާ މި ދަފްތަރުގެ ބޭނުމަކީ ޓެކްސީ ޑްރައިވަރުން އާމްދަނީ ހޯދުމަށް ކުރާ މަސައްކަތްތަކަށް ފަސޭހަކޮށްދިނުމެވެ. އެގޮތުން މާލީ ނިޒާމުގެ ތެރެއިން ލޯނު ނެގުމާއި މަލީ ވަސީލަތްތައް ހޯދަން ފަސޭހަކޮށްދިނުމާއި އަދި ޑިޖިޓަލް ޕޭމަންޓް ނިޒާމުގެ ތެރެއިން މުއާމަލާތްކުރުން ފަސޭހަކޮށްދިނުން ހިމެނޭ ކަމަށްވެސް ވިދާޅުވި އެވެ.
"ބޭންކް ތަކާ މަޝްވަރާކޮށްގެން މިފަދަ ނިޒާމެއްގެ ދަށުން މަސައްކަތް ކުރެވޭނެ ގޮތެއް ހަމަޖައްސައިދޭނެ،" ނާޒިމް ވިދާޅުވިއެވެ.
މިމަސައްކަތުގައި އެއްވެސް ޓެކްސީ ޑްރައިވަރެއްގެ ހައްގު ގެއްލިގެން ނުދާ ގޮތަށް މަސައްކަތް ކޮށްދިނުމަށް ރައީސް އަންގަވާފައިވާ ކަމަށްވެސް ނާޒިމު ވިދާޅުވި އެވެ.