އެމްޑީޕީގެ ޓިކެޓް ކަށަވަރުވި ބޭފުޅުންގެ ލިސްޓަށް ބަދަލު ގެނެސްފި

ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓްގައި ވާދަކުރެއްވުމަށް ހުށަހެޅުއްވި ބޭފުޅުންގެ ތެރެއިން ޓިކެޓް ކަށަވަރުވި ބޭފުޅުންގެ ލިސްޓް ކަމަށް ބުނެ އާންމުކުރި ލިސްޓަށް ބަދަލެއް އައިސްފި އެވެ.

އެމްޑީޕީން މި ލިސްޓް އިއްޔެ އާންމުކުރިއިރު އޭރު 36 ބޭފުޅުން ހިމެނެ އެވެ. ނަމަވެސް ލިސްޓް އިސްލާހުކޮށް މިއަދު އާންމުކުރިއިރު މިލިސްޓްގައި މިހާރު ހިމެނެނީ 35 ބޭފުޅުންނެވެ.

ލިސްޓް އިސްލާހުކުރިއިރު އިއްޔެގެ ލިސްޓްގައި ހިމެނުނު ދެ ބޭފުޅެއްގެ ނަން ލިސްޓުން އުނިކޮށް ކުރިން ލިސްޓުގައި ނެތް ބޭފުޅެއްގެ ނަން މިހާރު ވަނީ ހިމަނާފަ އެވެ. އިސްލާހު ކުރި ލިސްޓްގައި އަލަށް ހިމަނާފައިވަނީ ޕްރައިމަރީއަކާ ނުލައި ފޭދޫ ދެކުނު ދާއިރާގެ އެމްޑީޕީގެ ޓިކެޓް ކަށަވަރުވި އަބްދުﷲ ހަނީފްގެ ނަމެވެ. އިއްޔެ ފުރަތަމަ އާންމު ކުރި ލިސްޓުން އުނިކުރި ދެ ބޭފުޅުންނަކީ ގައްދޫ ދާއިރާގެ ޓިކެޓް ލިބިވަޑައިގެންނެވި އަހްމަދު ސައީދު މުހައްމަދު (ފެނަކަ ސައީދު)ގެ ނަމާއި ގެމަނަފުށި ދާއިރާގެ ޓިކެޓް ލިބިވަޑައިގެންނެވި އެ ދާއިރާގެ މިހާރުގެވެސް މަޖިލިސް މެންބަރު އަހްމަދު ސައީދުގެ ނަމެވެ.

އަވަސްއަށް މައުލޫމާތު ދެއްވަމުން އެމްޑީޕީގެ ޑެޕިއުޓީ ޗެއާޕާސަން އިބްރާހީމް ވަހީދު (އިބްރޭ) ވިދާޅުވީ ދެ ސައީދުގެ ނަން ލިސްޓުން މިވަގުތަށް އުނިކޮށްލީ ލިބިފައިވާ ޝަކުވާއަކާ ގުޅިގެން އެ މައްސަލަ ބެލުމަށް ކަމަށެވެ. މައްސަލަ ބެލުމަށްފަހު އެ ދެ ބޭފުޅުންގެ ނަން ލިސްޓުގައި ހިމަނަން ފެންނަ ކަމަށްވާނަމަ ހިމަނާނެ ކަމުގައިވެސް ވިދާޅުވި އެވެ.

"ލިސްޓް އިއްޔެ އާންމުކުރުމާއެކު ގައްދޫ ދާއިރާ އާއި ގެމަނަފުށި ދާއިރާ އިން ލިބުނު ޝަކުވާއެއް. އެއީ އެ ދެ ދާއިރާގެ ޕްރައިމަރީއަށް ކުރިމަތިލީ ދެ ބޭފުޅެއްގެ ފަރާތުން ލިބުނު ޝަކުވާއެއް. އެކަމަކު މިހާތަނަށް ބެލިއިރު އެއީ އެމްޑީޕީގައި ނަން އޮތް ދެ ބޭފުޅުންނެއް ނޫން. އެހެންވެ އެ ދެ ބޭފުޅުންނަށް އޮންނާނީ ރަސްމީކޮށް ޝަކުވާ ހުށަހެޅުމަށް 48 ގަޑިއިރުގެ ވަގުތެއް ދީފައި. އެހެންވީމާ މައްސަލަ ނިމުމާއެކު އަނެއްކާވެސް ލިސްޓް އަޕްޑޭޓްވުމުގެ ފުރުސަތު ނުވަތަ އިއްޔެ ލިސްޓް ނެރުނުއިރު އޮތް ދެ ބޭފުޅުން އޮތުމުގެ ފުރުސަތުވެސް އޮންނާނެ،" އިބްރޭ ވިދާޅުވި އެވެ.

ޕްރައިމަރީއަކާ ނުލައި ޓިކެޓް ކަށަވަރުވި ބޭފުޅުން

މި ބޭފުޅުންނަށް އެމްޑީޕީގެ ޓިކެޓް ކަށަވަރުވީ މަޖިލިސް ޕްރައިމަރީއަށް އެ ޕާޓީން ހުޅުވާލި ފުރުސަތުގައި މި ބޭފުޅުން ކުރިމަތިލެއްވި ދާއިރާތަކަށް ވާދަކުރުމަށްޓަކައި އެމްޑީޕީގެ ޓިކެޓަށް އިތުރު ބޭފުޅަކު ކުރިމަތިލައްވާފައި ނުވާތީ އެވެ.

ޕްރައިމަރީއަކާ ނުލައި އެމްޑީޕީގެ ޓިކެޓް ކަށަވަރުވި ބޭފުޅުންގެ ތެރޭގައި ރައްޔިތުންގެ މަޖިލީހުގައި މިހާރުވެސް ހިމެނޭ އެމްޑީޕީގެ 16 މެންބަރަކު ހިމެނެ އެވެ.

އެމްޑީޕީން ބުނީ އެއް ކެންޑިޑޭޓަަށް ވުރެ ގިނަ ކެންޑިޑޭޓުން ކުރިމަތިލާފައިވާ ދާއިރާތަކުގައި އަމަލުކުރާނެ ގޮތެއް ގައުމީ މަޖިލީހުގެ ނިންމުމާ އެއްގޮތަށް އެކުލަވާލާފައިވާ ވިލަރެސް ކޮމިޓީން ނިންމުމުން އެގޮތެއް އިއުލާން ކުރާނެ ކަމަށެވެ.

ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި 93 ދާއިރާއަށް މެންބަރުން ހޮވާނެ އެވެ. އިންތިހާބު ބާއްވާ ތާރީހް އަންނަ އާދިއްތަ ދުވަހު އިއުލާންކުރާނެ ކަމަށް އިލެކްޝަންސް ކޮމިޝަނުން މިއަދު ބުނެފައިވެ އެވެ.