ފޮރިން މިނިސްޓަރު މޫސާ ޒަމީރު ރަސްމީ ދަތުރުފުޅެއްގައި މިރޭ ގަތަރަށް ފުރާވަޑައިގެންފި އެވެ.
ފޮރިން މިނިސްޓްރީން ބުނީ މިނިސްޓަރު ޒަމީރުގެ މިދަތުރުފުޅުގައި ގަތަރުގެ ބޮޑުވަޒީރުގެ މަގާމާއި ހާރިޖީ ވަޒީރުގެ ވަޒީރުގެ މަގާމުވެސް ފުރުއްވަމުން ގެންދަވާ ޝައިހް މުހައްމަދު ބިން އަބްދުއްރަހްމާން ބިން ޖާސިމް އަލްތާނީއާ އެކު މަތީ ފަންތީގެ މަޝްވަރާތަކެއް މިނިސްޓަރު ޒަމީރު ކުރިއަށް ގެންދަވާނެ ކަމަށެވެ.
މިހަފްތާގެ ހޯމަ ދުވަހުގެ ނިޔަލަށް ޒަމީރު ކުރައްވާ މިދަތުރުފުޅުގައި ދެ ގައުމުގެ ގުޅުން އިތުރަށް ބަދަހިކުރުމާ ގުޅޭ ގޮތުންނާއި އަދި އެކި ދާއިރާތަކުން އެ ގުޅުން ބަދަހިކުރުމަށް މަޝްވަރާކުރައްވާނެ ކަމަށްވެސް ރާއްޖޭގެ ފޮރިން މިނިސްޓްރީން ބުނެ އެވެ.
ރާއްޖެ އިން ގަތަރާ އެކު ސިޔާސީ ގުޅުން ގާއިމުކުރިތާ މި އަހަރު 40 އަހަރު ފުރޭނެ އެވެ.
މިނިސްޓަރު ޒަމީރުގެ އަރިހުގައި ރާއްޖެއިން ޗައިނާއަށް ކަނޑައަޅުއްވާފައިވާ ސަފީރު އަދި ކުރީގެ ގަވަރުނަރު ފަޒީލް ނަޖީބާއި، ސެކްރެޓަރީ، ބައިލެޓަރަލް ޑރ. ހާލާ ހަމީދާއި ފޮރިން މިނިސްޓްރީގެ އެސިސްޓެންޓް ޑިރެކްޓަރު ލަމްހާ ސަލީމްވެސް ގަތަރަށް ފުރާވަޑައިގެންނެވި އެވެ.
ރައީސް އަބްދުﷲ ޔާމީންގެ ވެރިކަމުގައި ދިވެހިރާއްޖެއިން ގަތަރާ އެކު ގާއިމުކޮށްފައި އޮތް ސިޔާސީ ގުޅުން ޖޫން 5، 2017 ގައި ކަނޑާލި އެވެ. އެކަމަކު ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ޖެނުއަރީ 5، 2021 ގައި ވަނީ އަލުން އެ ގުޅުން އިއާދަށްކޮށްފަ އެވެ.